لاہور : دوسری چیف آف آرمی اسٹاف نیشنل انٹر کلب ہاکی چیمپئن شپ کے فائنل مرحلے کا آغاز ہوگیا، جس میں ملک بھر سے 10 بہترین ٹیمیں شامل ہیں، ایونٹ کا فائنل 15 فروری کو کھیلا جائے گا۔
دوسری چیف آف آرمی اسٹاف نیشنل انٹر کلب ہاکی چیمپئن شپ 2025ء کے فائنل راؤنڈ کا آغاز آج ایک رنگا رنگ افتتاحی تقریب کے ساتھ ہوگیا۔
افتتاحی تقریب میں اسکول کے بچوں اور کھلاڑیوں نے کثیر تعداد میں شرکت کی، تقریب میں ٹورنامنٹ کی ٹرافی کی رونمائی بھی کی گئی۔
چیمپئن شپ کے آفیشل گانے، ملی نغموں اور پاکستان رینجرز پنجاب کے بینڈ نے حاضرین کے جوش و خروش میں مزید اضافہ کیا۔
معزز مہمانوں میں ہاکی کے قومی ہیروز چوہدری اختر رسول، منظور الحسن، توقیر ڈار، شہباز احمد سینئر، طاہر زمان، آصف باجوہ، انجم سعید، دانش کلیم، کامران اشرف، محمد خالد، طارق شیخ، شیخ محمد عثمان، محمد کاشف، محمد عاصم، میاں زاہد اقبال اور بابر عبداللہ کے علاوہ صدر پاکستان ہاکی فیڈریشن (پی ایچ ایف) میر طارق حسین بگٹی اور سیکریٹری رانا مجاہد علی شامل تھے۔
سیکریٹری پی ایچ ایف نے قومی کھیل کی بحالی کیلئے مسلسل تعاون پر پاک فوج کا شکریہ ادا کیا، انہوں نے ایونٹ میں شریک ٹیموں، عہدیداروں اور منتظمین کو بھی سراہا اور کامیاب انعقاد پر مبارکباد دی۔
فائنل راؤنڈ میں 10 بہترین ٹیمیں شامل ہیں، جنہوں نے ضلعی، ڈویژنل اور صوبائی راؤنڈز کے بعد قومی سطح کے مقابلوں کیلئے کوالیفائی کیا ہے۔
ٹورنامنٹ کا آغاز 20 دسمبر 2024ء سے پاکستان بھر میں ضلعی سطح کے مقابلوں سے ہوا، جس میں 57 اضلاع سے 11594 کھلاڑیوں نے 527 کلبوں کی نمائندگی کرتے ہوئے حصہ لیا۔
پنجاب سے چار، سندھ اور کے پی کے سے دو دو اور بلوچستان، گلگت بلتستان، آزاد کشمیر، اسلام آباد سے ایک ایک ٹیم فائنل مرحلے کیلئے کوالیفائی کرچکی ہے، یہ ٹیمیں قومی سطح پر اپنی صلاحیتوں اور مہارت کا مظاہرہ کرتے ہوئے چیمپئن شپ ٹرافی کیلئے مقابلہ کریں گی۔
رپورٹ کے مطابق بہترین 10 ٹیموں کے درمیان مقابلے 15 فروری 2025ء کو منعقد ہونیوالے فائنل میچ اور اختتامی تقریب تک جاری رہیں گے۔
