چیمپینز ٹرافی شروع ہونے سے پہلے ہی بھارتی کرکٹ ٹیم کو بڑا دھچکا۔۔۔ اہم فاسٹ بولر جسپریت بمراہ انجری کا شکار ہو گئے۔۔۔
اب بھارتی ٹیم کو جسپریت بمراہ کے بغیر ہی میدان میں اترنا پڑے گا۔۔۔
بھارتی کرکٹ بورڈ نے جسپریت بمبراہ کی عدم دستیابی سے انٹرنیشنل کرکٹ کونسل کو آگاہ کر دیا۔۔۔
جسپریت بمراہ کی جگہ ہرشیت رانا کو بھارتی ٹیم میں شامل کیا گیا ہے۔
اس کے علاوہ ورون چکر ورتھی بھی چیمپئنز ٹرافی کے اسکواڈ میں شامل کیے گئے ہیں، ورون چکرورتھی کو یشسوی جیسوال کی جگہ ٹیم میں شامل کیا گیا ہے۔
خیال رہےکہ آسٹریلیا کے حالیہ دورے کے اختتام پر بمراہ کو کمر کے درد کا سامنا کرنا پڑا تھا، جس کی وجہ سے وہ سڈنی میں پانچویں ٹیسٹ کی دوسری اننگز میں بولنگ نہیں کر سکے تھے۔
بارڈرگواسکر ٹرافی کے دوران بمراہ نے 5 ٹیسٹ میچوں میں مجموعی طور پر 151.2 اوورز کروائے اور 32 وکٹوں کے ساتھ سب سے کامیاب بولر رہے۔
بمراہ انگلینڈ سے ہونے والی ون ڈے سیریز کے اسکواڈ میں شامل تھے تاہم انہوں نےکوئی میچ نہیں کھیلا جب کہ وہ چیمپئنز ٹرافی کے عارضی 15 رکنی اسکواڈ میں بھی شامل تھے۔
آئی سی سی چیمپئنز ٹرافی 19 فروری کو شروع ہوگی۔
چیمپئنز ٹرافی کے لیے بھارتی ٹیم میں روہت شرما (کپتان)، شبمن گل (نائب کپتان)، ویرات کوہلی، شریاس ائیر، کے ایل راہول (وکٹ کیپر)، رشبھ پنت (وکٹ کیپر)، ہاردک پانڈیا، اکشر پٹیل، واشنگٹن سندر، کلدیپ یادیو، ہرشیت رانا، محمدشامی، ارشدیپ سنگھ، رویندرا جدیجا اور ورون چکرورتھی شامل ہیں۔
