راولپنڈی : ڈی جی آئی ایس پی آر لیفٹیننٹ جنرل احمد شریف چودھری کا کہنا ہے کہ ہم امن پسند قوم ہیں لیکن بھارت نے اُکسایا یا حملہ کیا تو ہمارا ردعمل تیز اور بے رحمانہ ہوگا۔
ترک خبر ایجنسی کو انٹرویو میں لیفٹیننٹ جنرل احمد شریف چوہدری نے کہا کہ بھارت پہلگام واقعے میں پاکستان کو مورد الزام ٹھہراکر ثبوت دینے میں ناکام رہا، نئی دہلی ان واقعات کو دہشتگردی کے بہانے کے طور پر استعمال کررہی ہے۔ پاکستان بھارتی تسلط کے سامنے نہیں جُھکے گا۔
ترجمان پاک فوج نے کہا کہ پاکستان دنیا میں سب سے زیادہ دہشتگردی کاشکار ملک ہے، جنوری2024 سے اب تک 3 ہزار 700 سے زائد دہشتگردی واقعات ہوچکے، جن میں 3 ہزار 896 افراد جاں بحق ہوئے، جن میں سے 1314 سیکیورٹی اہلکار بھی شامل ہیں۔ 2500 سے زائد افراد اعضا کھوچکے،لاکھوں لوگ جان سے گئے۔ اس دہشتگردی کی سرپرستی اور حوصلہ افزائی بھارت کررہا ہے۔
ڈی جی آئی ایس پی آر نے کہا کہ کشمیر ایک بین الاقوامی تسلیم شدہ تنازع ہے، بھارت مسئلہ کشمیرکو حل کرنے کی کوشش نہیں کررہا، بھارت جبرسےاسےاندرونی مسئلہ بنانے کی کوشش کررہاہے۔
ترجمان پاک فوج نے کہا کہ ہم امن پسند قوم ہیں،بھارت نے اُکسایایا حملہ کیا تو ہماراردعمل تیز اور بے رحمانہ ہوگا، حقیقت یہ ہے کہ بھارت امریکا نہیں اور پاکستان افغانستان نہیں ہے، بھارت اسرائیل نہیں ہے اور پاکستان فلسطین نہیں ہے، بھارت جتنی جلدی یہ سمجھ جائے علاقائی اورعالمی امن کیلئے اچھا ہوگا۔
لیفٹیننٹ جنرل احمد شریف چوہدری نے مزید کہا کہ جعفرایکسپریس پر حملہ کرنیوالی کالعدم بی ایل اے نے کھلے عام بھارت سے فوجی مدد مانگی، نئی دہلی میں رہنماؤں، سیاست دانوں اور ریٹائرڈ جنرلز نے بی ایل اے کی حمایت میں بیانات دیے۔
ترجمان پاک فوج نے کہا کہ حالیہ کشیدگی میں بھارت کے جنگی طیارے مار گرائے جن میں سے 3رافیل تھے، دنیا جانتی ہے کہ پاکستان نے بھارتی طیارے گرائے لیکن نئی دہلی اسے ماننے کوتیار نہیں۔
