کراچی : اداکار و ہدایتکار احمد حسن نے اپنی ازدواجی زندگی کے دلچسپ پہلوؤں پر بات کرتے ہوئے انکشاف کیا کہ وہ ہر رات سونے سے پہلے اپنی اہلیہ نوشین احمد کے پاؤں دباتے ہیں۔
احمد حسن نے حال ہی میں اپنی اہلیہ و اداکارہ نوشین احمد کے ہمراہ نجی ٹی وی کے پروگرام میں شرکت کی، جہاں انہوں نے مختلف معاملات پر کھل کر گفتگو کی۔
اداکار کے مطابق نوشین انہیں بہت اچھی لگیں، اس لیے اگلے ہی دن باتوں باتوں میں انہوں نے ان سے دریافت کیا کہ آیا وہ منگنی شدہ تو نہیں، جب معلوم ہوا کہ وہ منگنی شدہ نہیں ہیں تو انہوں نے فوری شادی کی پیشکش کر دی اور صرف ایک ہفتے کے اندر اندر ان کی نوشین احمد سے شادی ہو گئی۔
ان کا یہ بھی کہنا تھا کہ حال ہی میں انہوں نے ایک ڈرامے کی ہدایتکاری کی، جس میں ان کی اہلیہ نے بطور اداکارہ کام کیا، چونکہ ڈرامے میں سینئر اداکار بھی شامل تھے، تو کسی کو یہ محسوس نہ ہو کہ وہ اپنی اہلیہ کی طرفداری کر رہے ہیں، اس لیے وہ کبھی کبھار انہیں ڈانٹ بھی دیا کرتے تھے، تاہم فطری طور پر وہ ان سے نرمی سے پیش آتے تھے۔
انہوں نے یہ بھی کہا کہ وہ ایک فرماں بردار شوہر ہیں، روز رات کو سونے سے پہلے اپنی بیوی کے پاؤں دباتے ہیں، جس کی ان کی اہلیہ نوشین احمد نے بھی تصدیق کی اور ہنستے ہوئے کہا کہ ظاہر ہے وہ ایسا ہی کریں گے کیونکہ وہ ان کے شوہر ہیں۔
