اسلام آباد : وفاقی وزیر اطلاعات و نشریات عطاء اللہ تارڑ نے کہا ہے کہ نو مئی ملکی تاریخ کا سیاہ ترین دن تھا، ملزمان کو سزائیں شفاف ٹرائل کے تحت قانون کے مطابق ہوئیں، آئندہ کوئی بھی دشمن کے ہاتھ مضبوط کرنے کی جرأت نہیں کرےگا۔
وفاقی وزیر اطلاعات و نشریات نے انسداد دہشتگردی عدالت کے فیصلے حوالے سے گفتگو کرتے ہوئے کہا کہ فیصل آباد میں نو مئی کیسز کےفیصلوں کا خیرمقدم کرتےہیں، نو مئی ملکی تاریخ کا سیاہ ترین دن تھا، ملزمان کو سزائیں شفاف ٹرائل کے تحت قانون کے مطابق ہوئیں۔
انہوں نے کہا کہ نومئی کو گھناؤنا جرم کیا گیا تھا،بانی ( پی ٹی آئی ) زوم میٹنگ میں حملوں کی ترغیب دیتے رہے تھے، شہداء کی یادگاروں کی بےحرمتی،عسکری تنصیبات پر حملے کیےگئے،ان حملوں کے ناقابل تردید شواہد موجود ہیں۔
انہوں نے کہا کہ نو مئی والوں نے وہ کام کیا جو دشمن بھی نہ کرسکا، آئندہ کسی کو بھی نو مئی جیسے حملے کرنے کی جرأت نہیں ہوگی، اور نہ سزاؤں کےبعد آئندہ کوئی دشمن کے ہاتھ مضبوط کرنے کی جرأت کرےگا۔
وفاقی وزیر اطلاعات و نشریات نے کہا کہ ملک میں آئین اور قانون کی حکمرانی چاہتے ہیں۔
