انگلش بلے باز جوروٹ نے بھارت کے خلاف ٹیسٹ میچ میں اپنی39 ویں سنچری مکمل کر لی۔۔ وہ ٹیسٹ میچ میں سب سے زیادہ سنچریز بنانے والوں کی فہرست میں چوتھے نمبر پر آ گئے۔۔ انہوں نے سری لنکا کے سنگاکارا کا ریکارڈ توڑ دیا۔
جو روٹ نہ صرف ورلڈ ٹیسٹ چیمپئن شپ میں سب سے زیادہ رنز بنانے والےکھلاڑی ہیں بلکہ وہ ٹیسٹ کرکٹ کی تاریخ میں ٹنڈولکر کے بعد دوسرے سب سے زیادہ رنز بنانےکا ریکارڈ رکھتے ہیں۔
انہوں نے 158 ٹیسٹ میچز میں 57.49 کی اوسط سے 13 ہزار 543 رنز بنائے ہیں جن میں 39 سنچریاں اور 66 نصف سنچریاں شامل ہیں جب کہ ٹنڈولکر نے 200 ٹیسٹ میچز میں 53.78 کی اوسط سے 15 ہزار 921 رنز بنا رکھے ہیں۔
موجودہ کھلاڑیوں میں صرف آسٹریلیا کے اسٹیو اسمتھ ہیں جنہوں نے ٹیسٹ کرکٹ میں 10 ہزار 477 رنز بنارکھے ہیں۔ جو روٹ کے علاوہ کوئی اور کھلاڑی ٹندولکر کے ریکارڈ کے قریب نہیں ہے۔
34 سالہ جو روٹ نے آئی سی سی ورلڈ ٹیسٹ چیمپئن شپ میں 6,000 رنز بنانے والے پہلےکھلاڑی ہونےکا اعزاز حاصل کرلیا ہے۔
جو روٹ نے یہ سنگ میل بھارت کے خلاف جاری پانچ ٹیسٹ میچوں کی سیریز کے آخری میچ میں عبور کیا۔
انگلش بیٹر نے ورلڈ ٹیسٹ چیمپئن شپ کے اپنے 69 ویں میچ میں یہ سنگ میل عبور کیا۔ وہ اب تک ہونے والی چاروں چیمپئن شپ میں حصہ لے چکے ہیں۔
