رواں سال مئی میں ازلی دشمن بھارت کے خلاف معرکہ حق میں پاکستان کی شاندار فتح پر اسٹیٹ بینک نے یادگاری سکہ جاری کر دیا۔ سکے کی مالیت 75 روپے ہے۔۔
اسٹیٹ بینک نے اپنے اعلامیے میں کہا کہ وفاقی حکومت کی ہدایت پر معرکہ حق میں مسلح افواج کی جرات اور بہادری کو خراجِ تحسین پیش کرنے اور یومِ آزادی کو شایانِ شان منانے کے لیے75 روپے مالیت کا یادگاری سکہ جاری کیا گیا ہے۔
سکے کی دھاتی ساخت میں نِکل اور پیتل موجود ہے جس میں کاپر 79 فیصد، زنک 20 اور نِکل ایک فیصد ہے، یاد گاری سکے کا قطر 30 ملی میٹر اور وزن 13.5 گرام ہے۔
سکے کا سامنےکا رُخ
سکے کے سامنے والے رخ پر بڑھا ہوا ہلال اور 5 نوکوں کا ابھرتا ہوا ستارا دکھائی دے رہاہے، جس کا رُخ شمال مغرب کی جانب ہے، چاند اور ستارے کے اوپر کنارے کے ساتھ ساتھ اردو میں ’اسلامی جمہوریہ پاکستان‘ کے الفاظ کندہ ہیں۔
چاند کے نیچے اور 2 بالائی سمت مڑتی ہوئی گندم کی بالیوں کے اوپر اجرا کا سال 2025 درج ہے، ہلال کے دائیں اور بائیں جانب بالترتیب جلی اعداد میں 75 اور اردو میں لفظ روپیہ درج ہے۔
پچھلا رُخ
سکے کے پچھلے رخ پر وسط میں اردو میں معرکہ حق تحریر ہے اور نیچے ہندسوں میں 2025 درج ہے۔ سکے کے اوپری کنارے کے ساتھ اردو میں ’پاکستان ہمیشہ زندہ باد‘ لکھا ہوا ہے۔
سکے پر دائیں اور بائیں جانب 2 لڑاکا طیارے، بحری جہاز اور ملٹی راکٹ لانچر سسٹم ابھرے ہوئے دکھائے گئے ہیں۔
یادگاری سکہ آج (15 اگست) سے اسٹیٹ بینک آف پاکستان بینکنگ سروسز کارپوریشن کے تمام فیلڈ دفاتر کے ایکسچینج کاؤنٹرز سے دستیاب ہوگا۔
