پاکستان اور سعودی عرب کے درمیان تجارت و سرمایہ کاری کے فروغ پر اتفاق ہوگیا۔
اعلامیے کے مطابق اسلام آباد میں سعودی پاک مشترکہ بزنس کونسل کا اجلاس ہوا۔ سعودی وفد کی قیادت چیئرمین سعودی پاک مشترکہ بزنس کونسل شہزادہ منصور بن محمد السعود نے کی۔ پاکستان کی جانب سے وفاقی وزرا، حکومتی اداروں کے نمائندے اور نجی شعبے کے اعلیٰ حکام اجلاس میں شریک تھے۔ سعودی وفد کو پاکستان میں سرمایہ کاری کے مواقع سے آگاہ کیا گیا۔
اعلامیے کے مطابق ایس آئی ایف سی کے حکام نے وزارتِ تجارت کے تعاون سے سعودی وفد کو تفصیلی بریفنگ دی۔ سعودی وفد نے پاکستان کی نمایاں کمپنیوں کے عہدیداران کے ساتھ ملاقاتیں بھی کیں۔ ملاقاتوں میں ترجیحی شعبوں میں سرمایہ کاری کے امکانات کا جائزہ لیا گیا۔
سعودی کاروباری شخصیات پر مشتمل اعلیٰ سطح کا وفد پاکستان کے پانچ روزہ دورے پر ہے۔ یہ دورے کو سعودی وژن 2030 اور پاکستان کے سرمایہ کاری کے فروغ کے لیے ایک اہم سنگِ میل قرار دیا جا رہا ہے۔
