غزہ — غزہ پر اسرائیل کی تازہ ترین فضائی بمباری میں شہادتوں کی تعداد 110 سے تجاوز کر گئی ہے، جب کہ درجنوں فلسطینی زخمی حالت میں اسپتالوں میں زیرِ علاج ہیں۔
فلسطینی وزارتِ صحت کے مطابق، اسرائیلی افواج نے گذشتہ رات غزہ شہر اور رفح کے رہائشی علاقوں پر شدید فضائی حملے کیے، جن میں خواتین اور بچوں سمیت درجنوں شہری جاں بحق ہوئے۔
کئی مکانات مکمل طور پر تباہ ہوگئے جبکہ امدادی ٹیمیں ملبے تلے دبے افراد کی تلاش میں مصروف ہیں۔
عینی شاہدین کے مطابق، بمباری اتنی شدید تھی کہ پورا علاقہ لرز اٹھا، بجلی اور مواصلاتی نظام بھی مکمل طور پر متاثر ہوگیا۔
دوسری جانب، اسرائیلی فوج نے دعویٰ کیا ہے کہ حملوں کا ہدف مزاحمتی تنظیموں کے مراکز اور کمانڈ پوسٹس تھیں، تاہم مقامی ذرائع کے مطابق، نشانہ بنیادی طور پر رہائشی آبادی بنی۔
فلسطینی تنظیم حماس نے اسرائیلی جارحیت کی شدید مذمت کرتے ہوئے عالمی برادری اور اقوامِ متحدہ سے فوری مداخلت کا مطالبہ کیا ہے تاکہ غزہ میں جاری انسانی المیہ کو روکا جا سکے۔
گزشتہ چند روز کے دوران اسرائیلی حملوں میں شہید ہونے والے فلسطینیوں کی مجموعی تعداد ایک ہزار سے زائد ہو چکی ہے، جب کہ ہزاروں افراد بے گھر ہو گئے ہیں۔
About The Author
