اٹلی میں المناک حادثہ: برفانی تودے کی زد میں آ کر 5 جرمن کوہ پیما ہلاک

جنوبی ٹائرول — اٹلی کے شمالی صوبے جنوبی ٹائرول میں برفانی تودے کی زد میں آ کر پانچ جرمن کوہ پیما جان کی بازی ہار گئے۔ حادثہ دو مختلف مقامات پر پیش آیا جہاں کوہ پیما الگ الگ گروپس میں سفر کر رہے تھے۔

برطانوی میڈیا کے مطابق، ریسکیو ٹیموں نے تمام پانچ جاں بحق کوہ پیماؤں کی لاشیں نکال لی ہیں۔
ہلاک ہونے والوں میں ایک خاتون کوہ پیما بھی شامل ہیں جن کے والد بھی اسی حادثے میں جاں بحق ہوئے۔

اطالوی حکام کے مطابق، تین افراد پر مشتمل ایک گروپ برفانی تودے کے نیچے دب کر مکمل طور پر بہہ گیا اور تمام ہی ہلاک ہو گئے۔
دیگر کوہ پیماؤں نے خطرے کی اطلاع فوراً حکام کو دی، جس کے بعد ہیلی کاپٹرز اور امدادی ٹیموں نے فوری طور پر علاقے میں ریسکیو آپریشن شروع کیا۔

ریسکیو عملہ نے بتایا کہ برفانی تودے کی شدت کے باعث امدادی کارروائیوں میں شدید مشکلات پیش آئیں۔
حادثہ پہاڑی علاقے میں اچانک درجہ حرارت بڑھنے کے بعد پیش آیا، جس کے نتیجے میں برفانی تودہ سرک گیا۔

جنوبی ٹائرول اٹلی کا ایک سیاحتی اور پہاڑی علاقہ ہے جو سرمائی کھیلوں اور کوہ پیمائی کے لیے مشہور ہے۔
مقامی انتظامیہ نے دیگر کوہ پیماؤں کو شدید موسم اور برفانی خطرات کے پیش نظر محتاط رہنے کی ہدایت کی ہے۔

اطالوی سول پروٹیکشن ادارے نے کہا "یہ حادثہ موسم کی غیر متوقع تبدیلیوں کی سنگین مثال ہے۔ پہاڑی علاقوں میں برفانی تودے کے خطرات بڑھ رہے ہیں، لہٰذا تمام کوہ پیما احتیاطی تدابیر اپنائیں۔”