سعودی ولی عہد شہزادہ محمد بن سلمان 18 نومبر کو صدر ٹرمپ سے ملاقات کریں گے

یہ ملاقات ایسے وقت میں ہو رہی ہے جب صدر ٹرمپ سعودی عرب کو ابراہیم معاہدے میں شامل کرنے کے لیے سرگرم ہیں — وہی سلسلہ جس کے تحت متحدہ عرب امارات، بحرین، سوڈان اور مراکش نے 2020 میں اسرائیل کے ساتھ تعلقات معمول پر لائے تھے۔

تاہم سعودی عرب نے ابھی تک اس معاہدے میں شمولیت سے گریز کیا ہے کیونکہ وہ اس بات پر اصرار کرتا ہے کہ فلسطینی ریاست کے قیام کی سمت واضح پیش رفت کے بغیر تعلقات کی بحالی ممکن نہیں۔

صدر ٹرمپ نے اتوار کو نشر ہونے والے پروگرام سی بی ایس کے “60 منٹس” میں کہا کہ انہیں یقین ہے کہ ”سعودی بالآخر معاہدے میں شامل ہوں گے۔“

دونوں رہنما ملاقات کے دوران امریکہ-سعودی دفاعی معاہدے پر بھی گفتگو کریں گے۔ فنانشل ٹائمز کے مطابق توقع ہے کہ بن سلمان کے دورے کے موقع پر اس معاہدے پر دستخط ہو سکتے ہیں۔

ٹرمپ انتظامیہ کے ایک سینیئر اہلکار نے کہا “کراؤن پرنس کے آنے پر کسی سمجھوتے پر دستخط کرنے سے متعلق بات چیت جاری ہے، لیکن تفصیلات ابھی حتمی نہیں ہوئیں۔”

رپورٹ کے مطابق سعودی عرب نے واشنگٹن سے سلامتی کی باضابطہ ضمانتوں کے ساتھ ساتھ جدید امریکی ہتھیاروں تک رسائی کی خواہش ظاہر کی ہے۔

سعودی عرب طویل عرصے سے امریکی اسلحے کا سب سے بڑا خریدار رہا ہے۔ دونوں ممالک کے تعلقات کی بنیاد تیل اور سلامتی کے تبادلے پر قائم ہے — مملکت توانائی فراہم کرتی ہے، جبکہ امریکہ دفاعی تحفظ دیتا ہے۔

یاد رہے کہ مئی 2025 میں صدر ٹرمپ کے ریاض کے دورے کے دوران امریکہ نے سعودی عرب کو تقریباً 142 ارب ڈالر مالیت کے اسلحہ پیکج کی فروخت پر اتفاق کیا تھا، جو دونوں ممالک کے درمیان دفاعی تعلقات کی نئی تاریخ رقم کرتا ہے۔