میانمار: میانمار کے وسطی علاقے ساگائنگ ریجن کے قصبے تبائین میں فوجی فضائی حملے کے نتیجے میں 18 افراد ہلاک اور متعدد زخمی ہو گئے۔
مقامی حکام اور عینی شاہدین کے مطابق جمعہ کی شام دو بم گرائے گئے، جن میں سے ایک بم مصروف ٹی شاپ پر لگا، جہاں اس وقت بڑی تعداد میں لوگ موجود تھے۔ ٹی شاپ اور قریب موجود کم از کم 12 مکانات مکمل طور پر تباہ ہو گئے۔
امدادی کارکنوں کے مطابق، حملے کے فوراً بعد سات افراد موقع پر ہی جاں بحق ہوئے جبکہ اسپتال میں مزید 11 زخمی دم توڑ گئے۔ ایک زندہ بچ جانے والے شخص نے بتایا کہ وہ ٹی شاپ میں باکسنگ میچ دیکھ رہا تھا جب طیارے کی آواز سن کر زمین پر لیٹ گیا، اور فوراً ہی زور دار دھماکہ اور آگ بھڑک اٹھی۔
مقامی افراد نے ہلاک ہونے والوں کی اجتماعی تدفین کی، جبکہ کئی لاشیں جھلسنے کے باعث ناقابل شناخت تھیں۔
خیال رہے کہ 2021 میں فوجی بغاوت کے بعد سے میانمار میں شدید خانہ جنگی جاری ہے، اور فوج کی جانب سے شہری علاقوں پر فضائی حملے معمول بن چکے ہیں، جس سے انسانی جانوں کو شدید خطرہ لاحق ہے۔
