برطانیہ میں ڈرون اڑانے کے نئے قواعد یکم جنوری سے نافذ -

لندن — برطانیہ میں یکم جنوری 2026 سے نئے ڈرون قوانین نافذ العمل ہو جائیں گے، جس کے تحت کھلی فضا میں 100 گرام یا اس سے زائد وزن کے ڈرون یا ماڈل ایئرکرافٹ اڑانے والے افراد کو لازمی طور پر آن لائن تھیوری ٹیسٹ پاس کرنا ہوگا۔

میڈیا رپورٹ کے مطابق تھیوری ٹیسٹ کامیابی سے پاس کرنے کے بعد فلائر آئی ڈی جاری کی جائے گی، جس کے بعد ہی ڈرون اڑانے کی اجازت ہوگی۔ اس سے قبل صرف 250 گرام یا اس سے زائد وزن کے ڈرونز کے لیے تھیوری ٹیسٹ لازمی تھا۔ ریگولیٹرز کے مطابق نئے قوانین کے نفاذ سے تقریباً 5 لاکھ افراد متاثر ہوں گے۔

قوانین کی تفصیلات

سول ایوی ایشن کے ترجمان جوناتھن نکلسن نے کہا کہ کرسمس کے موقع پر ڈرون تحفے کے طور پر ملنا عام ہے، تاہم اڑانے والوں کے لیے ضروری ہے کہ وہ قانون کی پابندی کریں۔
کیمرے والے 100 گرام سے زائد وزن کے ڈرون رکھنے والے افراد کو آپریٹر آئی ڈی لے کر سی اے اے (Civil Aviation Authority) کے ساتھ رجسٹر ہونا ہوگا۔
13 سال سے کم عمر بچوں کے لیے تھیوری ٹیسٹ کے وقت والدین یا سرپرست کی موجودگی لازمی ہوگی۔
12 سال سے کم عمر بچے کو ڈرون اڑانے کے لیے 16 سال یا اس سے زائد عمر کے فرد کی نگرانی درکار ہوگی، جبکہ والدین کو بھی فلائر آئی ڈی لینا ہوگی۔

خلاف ورزی پر جرمانہ اور سزا

فلائر آئی ڈی کے بغیر ڈرون اڑانا قانوناً جرم ہوگا، جس پر جرمانے کے علاوہ بعض صورتوں میں قید کی سزا بھی دی جا سکتی ہے۔

نئے قوانین کا مقصد ڈرونز کے محفوظ اور ذمہ دارانہ استعمال کو یقینی بنانا، اور شہریوں کی حفاظت کے ساتھ ساتھ فضائی ٹریفک کی روانی میں تعاون فراہم کرنا ہے۔