ماسکو – روس نے امریکا سے مطالبہ کیا ہے کہ وینزویلا کے صدر نکولس مادورو اور ان کی اہلیہ کو فوری طور پر رہا کیا جائے۔ روسی وزارتِ خارجہ کا کہنا ہے کہ ماسکو وینزویلا کی خودمختاری اور قومی مفادات کے تحفظ کے لیے اس کی حکومت کی غیر متزلزل حمایت جاری رکھے گا۔
روسی وزارتِ خارجہ کی جانب سے جاری بیان میں کہا گیا کہ روس، وینزویلا کے ساتھ قریبی، ہمہ جہت اور اسٹریٹجک تعاون کو مزید فروغ دیتا رہے گا۔ بیان میں امریکا کی قیادت پر زور دیا گیا کہ وہ قانونی طور پر منتخب صدر نکولس مادورو اور ان کی اہلیہ کی رہائی کو یقینی بنائے۔
روسی مؤقف کے مطابق 3 جنوری کو امریکا نے وینزویلا کے دارالحکومت کراکس میں شہری اور فوجی اہداف کو نشانہ بنایا، جنہیں وینزویلا کے وزیرِ خارجہ ایوان گل پنٹو نے کھلی فوجی جارحیت قرار دیا تھا۔ ان حملوں کے بعد وینزویلا میں ہنگامی حالت نافذ کر دی گئی۔
دوسری جانب امریکی صدر ڈونلڈ ٹرمپ نے وینزویلا پر حملے کی تصدیق کرتے ہوئے دعویٰ کیا تھا کہ صدر نکولس مادورو اور ان کی اہلیہ کو گرفتار کر کے ملک سے باہر منتقل کر دیا گیا ہے۔ بعد ازاں 5 جنوری کو دونوں کو نیویارک کے جنوبی ضلع کی وفاقی عدالت میں پیش کیا گیا، جہاں ان پر منشیات کی سمگلنگ سے متعلق الزامات عائد کیے گئے۔
صدر نکولس مادورو اور ان کی اہلیہ نے تمام الزامات کی سختی سے تردید کرتے ہوئے انہیں سیاسی انتقام قرار دیا ہے۔
About The Author
