چین کے نائب وزیر خارجہ لیو بن نے واضح کیا ہے کہ بیجنگ جوہری توانائی کے پُرامن استعمال کے حوالے سے ایران کے جائز حق کی حمایت کرتا ہے۔ خبر ایجنسی کے مطابق یہ بات انہوں نے بیجنگ میں اپنے ایرانی ہم منصب سے ملاقات کے دوران کہی۔
ملاقات میں نائب چینی وزیر خارجہ نے ایران کے خلاف طاقت کے استعمال کی دھمکیوں کی سخت مخالفت کرتے ہوئے کہا کہ چین اس مسئلے کا حل دباؤ یا جارحانہ اقدامات کے بجائے سفارتی ذرائع سے نکالنے کا حامی ہے۔
لیو بن نے مزید کہا کہ چین پابندیوں کے نفاذ کے ذریعے ایران پر دباؤ ڈالنے کی بھی مخالفت کرتا ہے اور ایران کے جوہری مسئلے کے منصفانہ اور مناسب حل کے لیے اپنی کوششیں جاری رکھے گا۔
چینی نائب وزیر خارجہ کا کہنا تھا کہ چین خطے میں استحکام اور بین الاقوامی قوانین کے تحت مسائل کے حل پر یقین رکھتا ہے اور اسی تناظر میں ایران کے ساتھ تعمیری مکالمے کی حمایت کرتا رہے گا۔
About The Author
