امریکا اور برطانیہ نے اسرائیل کے سفر پر وارننگ جاری کردی، کئی ممالک نے شہریوں کو ایران چھوڑنے کا مشورہ دیا
امریکا اور برطانیہ نے خطے میں بڑھتی ہوئی کشیدگی کے پیش نظر اسرائیل کے سفر سے متعلق انتباہ جاری کر دیا ہے، جبکہ متعدد ممالک نے اپنے شہریوں کو ایران چھوڑنے کی ہدایت کی ہے۔
امریکی سفارتخانے نے یروشلم سے جاری سیکیورٹی الرٹ میں کہا کہ امریکی شہری موجودہ علاقائی صورتحال کے باعث اپنے سفری منصوبوں پر نظرثانی کریں اور ممکنہ رکاوٹوں کے لیے تیار رہیں۔ برطانوی دفتر خارجہ نے بھی اسرائیل کے لیے نئی سفری ہدایت جاری کرتے ہوئے کہا کہ برطانوی شہری غیر ضروری سفر سے گریز کریں۔ برطانوی حکام کے مطابق خطے میں کشیدگی میں اضافے سے سفری مسائل اور غیر متوقع حالات پیدا ہو سکتے ہیں۔
ادھر برطانیہ، بھارت، اٹلی، اسپین اور پولینڈ سمیت کئی ممالک نے اپنے شہریوں کو ایران چھوڑنے کا مشورہ دیا ہے، جبکہ آسٹریلیا نے بھی اپنے شہریوں کو جلد از جلد ایران سے روانہ ہونے کی ہدایت کی ہے۔ سیکیورٹی صورتحال کے باعث برطانیہ نے تہران میں اپنا سفارتخانہ عارضی طور پر بند کر دیا اور اپنے سفارتی عملے کو واپس بلا لیا۔ پاکستانی حکام کے مطابق ایران میں زیرِ تعلیم درجنوں پاکستانی طلبہ بھی وطن واپس آ چکے ہیں۔
فضائی سفر پر بھی اثرات مرتب ہوئے ہیں۔ لوفتھانزا گروپ نے اعلان کیا ہے کہ وہ موجودہ صورتحال کے پیش نظر اسرائیل کے لیے صرف دن کے اوقات میں پروازیں چلائے گا اور ایرانی و عراقی فضائی حدود سے گریز کیا جائے گا، جبکہ بعض پروازوں کی منسوخی کا بھی امکان ہے۔
امریکی اور برطانوی حکام نے کہا کہ وہ صورتحال پر مسلسل نظر رکھے ہوئے ہیں اور شہریوں کو احتیاطی تدابیر اختیار کرنے کی ہدایت کر رہے ہیں۔
About The Author
