آئی سی سی ٹی ٹوئنٹی ورلڈ کپ 2026 کے چھٹے میچ میں سری لنکا نے دلچسپ اور سنسنی خیز مقابلے کے بعد آئرلینڈ کو 20 رنز سے شکست دے دی۔ یہ میچ کولمبو میں کھیلا گیا جہاں شائقین کو آخری اوور تک کانٹے دار مقابلہ دیکھنے کو ملا۔
میچ میں سری لنکا نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 163 رنز بنائے۔ کوشال مینڈس 56 رنز کے ساتھ ناٹ آؤٹ رہے جبکہ کامندو مینڈس نے 19 گیندوں پر جارحانہ 44 رنز کی اننگز کھیل کر اسکور کو قابلِ دفاع حد تک پہنچانے میں کلیدی کردار ادا کیا۔
سری لنکن ٹیم 16 اوورز تک دباؤ میں نظر آئی، تاہم آخری اوورز میں تیز رفتار بیٹنگ نے میچ کا رخ بدل دیا۔ آئرلینڈ کی جانب سے جارج ڈاکریئل اور بیری میکارتھی نے دو، دو وکٹیں حاصل کیں۔
جواب میں آئرلینڈ نے ہدف کے تعاقب میں شاندار آغاز کیا اور ایک موقع پر فتح کی مضبوط امیدوار دکھائی دینے لگی، خاص طور پر اس وقت جب ونندو ہسارنگا صرف دو گیندیں کرانے کے بعد تکلیف میں مبتلا نظر آئے۔ تاہم ہسارنگا نے زخمی حالت میں بھی بولنگ جاری رکھی اور تین اہم وکٹیں حاصل کر کے میچ کا پانسہ پلٹ دیا۔
مہیش تھیکشانا نے بھی شاندار کارکردگی کا مظاہرہ کرتے ہوئے تین کھلاڑیوں کو آؤٹ کیا۔ آئرلینڈ کی ٹیم 19.5 اوورز میں 143 رنز پر ڈھیر ہو گئی اور یوں ایک مضبوط پوزیشن کے باوجود ہدف حاصل کرنے میں ناکام رہی۔
اس شکست کے ساتھ آئرلینڈ نے ورلڈ کپ میں ایک سنہری موقع گنوا دیا، جبکہ سری لنکا نے غیر یقینی کارکردگی کے باوجود قیمتی فتح اپنے نام کر لی۔
واضح رہے کہ اس سے قبل چنئی میں کھیلے گئے ایک میچ میں نیوزی لینڈ نے افغانستان کو پانچ وکٹ سے شکست دی تھی۔ افغانستان نے پہلے بیٹنگ کرتے ہوئے 6 وکٹوں کے نقصان پر 182 رنز بنائے تھے، گلبدین نائب 63 رنز کے ساتھ نمایاں رہے، تاہم کیوی ٹیم نے ٹم سیفرٹ (65) اور گلین فلپس (42) کی عمدہ بیٹنگ کی بدولت 18ویں اوور میں ہدف حاصل کر لیا تھا۔
About The Author
