ڈھاکہ – بنگلہ دیش کی عبوری حکومت کے چیف ایڈوائزر پروفیسر محمد یونس نے 13ویں قومی پارلیمانی انتخابات اور جولائی نیشنل چارٹر کے نفاذ سے متعلق ریفرنڈم کے پُرامن اور منظم انعقاد پر قوم کو مبارکباد دیتے ہوئے عوام، ریاستی اداروں اور متعلقہ حکام کا شکریہ ادا کیا ہے۔
ووٹنگ کے اختتام کے بعد جاری بیان میں انہوں نے عوام کی بھرپور شرکت کو سراہتے ہوئے کہا کہ شہریوں نے اپنے آئینی حق کا استعمال کرتے ہوئے ملک کے مستقبل کی تشکیل میں فعال کردار ادا کیا۔ ان کا کہنا تھا کہ سیاسی جماعتوں، امیدواروں اور انتخابی عمل سے وابستہ اداروں نے ذمہ دارانہ طرزِ عمل اور پیشہ ورانہ صلاحیتوں کا مظاہرہ کیا۔
چیف ایڈوائزر نے الیکشن کمیشن، قانون نافذ کرنے والے اداروں، مسلح افواج، سول انتظامیہ، مبصر مشنز، میڈیا نمائندگان اور انتخابی عملے کا خصوصی شکریہ ادا کرتے ہوئے کہا کہ ان کی محنت اور لگن نے اس بڑے جمہوری عمل کو کامیاب بنایا۔
انہوں نے سیاسی جماعتوں اور امیدواروں پر زور دیا کہ حتمی نتائج کے اعلان کے بعد بھی جمہوری روایات، برداشت اور باہمی احترام کو برقرار رکھا جائے اور اختلافِ رائے کو قومی مفاد پر اثر انداز نہ ہونے دیا جائے۔
پروفیسر محمد یونس کا کہنا تھا کہ بنگلہ دیش نے ایک بار پھر ثابت کیا ہے کہ اصل طاقت عوام کے پاس ہے، اور حکومت ایک زیادہ جوابدہ، جامع اور منصفانہ ریاست کے قیام کے لیے اپنی کوششیں جاری رکھے گی۔
انہوں نے انتخابی عمل کو قومی جشن قرار دیتے ہوئے کہا کہ یہ ملک کی تاریخ کے پُرامن اور پُروقار ترین انتخابات میں سے ایک تھا اور اگر یہی مثبت رجحان برقرار رہا تو بنگلہ دیش کی جمہوریت مزید مضبوط ہوگی۔
About The Author
