بھارت سے شکست پر فواد چوہدری کا طنز، فیصل واوڈا سے کرکٹرز کو بھی فہرست میں شامل کرنے کی اپیل

ٹی 20 ورلڈ کپ میں بھارت کے ہاتھوں پاکستان کی 61 رنز سے شکست کے بعد سابق وفاقی وزیر فواد چوہدری نے دلچسپ اور طنزیہ انداز میں سینیٹر فیصل واوڈا سے اپیل کر دی۔

فواد چوہدری نے سماجی رابطے کے پلیٹ فارم ایکس (سابقہ ٹوئٹر) پر جاری اپنے بیان میں لکھا کہ فیصل واوڈا پانچ سو سیاستدانوں کی فہرست کے ساتھ ساتھ گیارہ کرکٹرز اور کرکٹ بورڈ کے "چمچوں کڑچھوں” کو بھی اپنی لسٹ میں شامل کر لیں۔ انہوں نے اپنی پوسٹ میں فیصل واوڈا کو ٹیگ کرتے ہوئے طنزیہ انداز میں شکریہ بھی ادا کیا۔

ان کا یہ بیان پاکستان کی بھارت کے خلاف شکست کے بعد سامنے آیا ہے جس میں قومی ٹیم کو بڑے مارجن سے ہار کا سامنا کرنا پڑا۔ اس میچ کے بعد ٹیم کی کارکردگی، سلیکشن اور ٹیم مینجمنٹ پر شدید تنقید جاری ہے جبکہ سوشل میڈیا پر بھی شائقین اور سابق کھلاڑیوں کی جانب سے سخت ردعمل دیکھنے میں آ رہا ہے۔