نئی دہلی – بالی ووڈ کے معروف کامیڈی اداکار راجپال یادو کو طویل عرصے سے جاری چیک باؤنس کیس میں مشروط ضمانت ملنے کے بعد جیل سے رہا کر دیا گیا۔
اداکار کو فروری کے پہلے ہفتے میں عدالت کے حکم پر تہاڑ جیل میں سرنڈر کرنا پڑا تھا کیونکہ وہ عدالت سے منظور شدہ تصفیہ معاہدے کی شرائط پوری کرنے میں ناکام رہے تھے۔ گزشتہ ہفتے دہلی کی عدالت نے ان کی ضمانت کی درخواست مسترد کرتے ہوئے کہا تھا کہ وہ تقریباً 9 کروڑ روپے کی ادائیگی نہیں کر سکے۔
عدالت میں سماعت کے دوران جسٹس سوارنا کانتا شرما نے واضح کیا تھا کہ اداکار کی قید محض رسمی کارروائی نہیں بلکہ تصفیہ معاہدے کی خلاف ورزی کے باعث انہیں جیل بھیجا گیا۔
پیر کے روز عدالت نے کچھ شرائط کے ساتھ ان کی ضمانت منظور کر لی جس کے بعد انہیں عارضی ریلیف حاصل ہوا۔
کیس کی تفصیلات
یہ معاملہ 2010 کا ہے جب راجپال یادو اور ان کی اہلیہ نے اپنی ہدایت کاری میں بننے والی فلم ’آتا پتا لاپتا‘ کے لیے تقریباً 5 کروڑ روپے قرض لیا تھا۔ فلم باکس آفس پر ناکام رہی جس کے بعد قرض کی واپسی ممکن نہ ہو سکی۔
مدعی کمپنی مرلی پروجیکٹس پرائیویٹ لمیٹڈ کو دیے گئے متعدد چیکس باؤنس ہو گئے تھے جس پر نیگوشی ایبل انسٹرومنٹس ایکٹ کے تحت قانونی کارروائی شروع ہوئی۔ سود اور جرمانوں کے باعث بقایا رقم بڑھ کر تقریباً 9 کروڑ روپے تک پہنچ گئی۔
تصفیہ معاہدہ ہونے کے باوجود طے شدہ ادائیگیاں نہ ہونے پر عدالت نے رواں ماہ سخت کارروائی کرتے ہوئے اداکار کو جیل بھیج دیا تھا، تاہم اب انہیں مشروط ضمانت مل گئی ہے۔
About The Author
