سرمائی اولمپکس 2026 میں خواتین کی آئس ہاکی کے مقابلوں میں امریکا ویمنز آئس ہاکی ٹیم اور کینیڈا ویمنز آئس ہاکی ٹیم نے اپنی فتوحات کا سلسلہ برقرار رکھتے ہوئے فائنل کے لیے کوالیفائی کر لیا۔
پہلے سیمی فائنل میں امریکا نے شاندار اور یکطرفہ کھیل پیش کرتے ہوئے سویڈن ویمنز آئس ہاکی ٹیم کو 0-5 سے شکست دے دی۔ میلان کے پالاٹالیا میں کھیلے گئے اس میچ میں امریکی ٹیم نے ابتدا ہی سے کھیل پر مکمل کنٹرول رکھا اور دفاع و حملے دونوں شعبوں میں برتری ثابت کی۔ گروپ مرحلے میں ناقابل شکست رہنے والی امریکی ٹیم نے سیمی فائنل میں بھی اپنی بہترین فارم برقرار رکھی۔
دوسرے سیمی فائنل میں کینیڈا اور سوئٹزرلینڈ ویمنز آئس ہاکی ٹیم کے درمیان سخت مقابلہ دیکھنے میں آیا۔ سنسنی خیز میچ میں کینیڈا نے 1-2 سے کامیابی حاصل کر کے فائنل میں جگہ بنائی۔ اس میچ میں دونوں ٹیموں کے درمیان سخت دفاعی کھیل دیکھنے کو ملا تاہم کینیڈین ٹیم فیصلہ کن لمحات میں برتری حاصل کرنے میں کامیاب رہی۔
امریکا اور کینیڈا کے درمیان ویمنز آئس ہاکی کا فائنل 19 فروری کو میلان میں کھیلا جائے گا، جہاں دونوں روایتی حریف ٹیمیں طلائی تمغے کے لیے مدمقابل ہوں گی۔ یہ مقابلہ ٹورنامنٹ کا سب سے بڑا اور سنسنی خیز میچ قرار دیا جا رہا ہے۔
About The Author
