امریکی سیکرٹ سروس نے صدر ڈونلڈ ٹرمپ کی نجی رہائش گاہ مار اے لاگو میں غیرقانونی داخلے کی کوشش کرنے والے ایک مسلح شخص کو گولی مار کر ہلاک کر دیا۔
سیکرٹ سروس کے ترجمان انتھونی گگلیلمی کے مطابق مشتبہ شخص کو اس وقت نشانہ بنایا گیا جب وہ پام بیچ کاؤنٹی کے شیرف کے اہلکاروں کے ساتھ مشترکہ کارروائی کے دوران حفاظتی زون میں داخل ہونے کی کوشش کر رہا تھا۔ واقعے کے وقت صدر ٹرمپ مار اے لاگو میں موجود نہیں تھے۔
مشتبہ شخص کے پاس اسلحہ اور ایندھن کا کین
سیکرٹ سروس کے مطابق ملزم کو مار اے لاگو پراپرٹی کے شمالی گیٹ کے قریب دیکھا گیا جہاں وہ ایک شاٹ گن اور ایندھن کا کین اٹھائے ہوئے تھا۔ فائرنگ کے بعد ہلاک ہونے والے شخص کی شناخت تاحال ظاہر نہیں کی گئی، تاہم حکام کا کہنا ہے کہ اس کی عمر تقریباً 20 سال تھی اور وہ ریاست شمالی کیرولائنا کا رہائشی تھا۔
ابتدائی تحقیقات کے مطابق اہلخانہ نے چند روز قبل اس کے لاپتہ ہونے کی رپورٹ درج کرائی تھی۔ تفتیش کاروں کا خیال ہے کہ وہ شمالی کیرولائنا سے جنوب کی جانب روانہ ہوا اور راستے میں شاٹ گن حاصل کی، جبکہ بندوق کا باکس اس کی گاڑی سے برآمد ہوا۔
تفتیش جاری
سیکرٹ سروس اور مقامی قانون نافذ کرنے والے ادارے واقعے کی مزید تحقیقات کر رہے ہیں تاکہ معلوم کیا جا سکے کہ ملزم کے ارادے کیا تھے اور آیا وہ کسی بڑے حملے کی منصوبہ بندی کر رہا تھا یا نہیں۔ حکام نے سیکیورٹی کے سخت اقدامات برقرار رکھنے کا عندیہ دیا ہے۔
About The Author
