امریکی صدر ڈونلڈ ٹرمپ نے ایک بار پھر ایران کو سخت پیغام دیتے ہوئے کہا ہے کہ اگر تہران نے معاہدہ نہ کیا تو اسے سنگین نتائج کا سامنا کرنا پڑے گا۔
ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں ایران پر ممکنہ حملے سے متعلق خبروں کو مسترد کرتے ہوئے کہا کہ ایک امریکی جنرل کے حوالے سے پھیلائی گئی رپورٹس جعلی ہیں اور ایران کے خلاف فوری فوجی کارروائی کا کوئی فیصلہ نہیں کیا گیا۔ انہوں نے کہا کہ ایرانی عوام عظیم ہیں اور انہیں نقصان نہیں پہنچنا چاہیے، تاہم ایرانی حکومت کو اپنے طرزِ عمل پر نظرثانی کرنا ہوگی۔
ادھر ایک امریکی عہدیدار کے مطابق امریکا کے نمائندہ خصوصی سٹیو وٹکوف جمعرات کو ایرانی وفد سے ملاقات کریں گے، جسے ممکنہ سفارتی پیش رفت کے طور پر دیکھا جا رہا ہے۔
اس سے قبل امریکی سینیٹر لنزے گراہم نے ایران کے بیلسٹک میزائل پروگرام پر تشویش ظاہر کرتے ہوئے کہا تھا کہ تہران کے پاس بڑی تعداد میں کم اور طویل فاصلے تک مار کرنے والے میزائل موجود ہیں جو خطے میں امریکی فوجی اڈوں کے لیے خطرہ بن سکتے ہیں۔ ان کا کہنا تھا کہ ایرانی ہتھیار امریکی فوجیوں کو نقصان پہنچانے کی صلاحیت رکھتے ہیں اور موجودہ ایرانی نظام خطے کے استحکام میں رکاوٹ ہے۔
لنزے گراہم نے یہ بھی کہا تھا کہ ایران میں “رجیم چینج” کے لیے عوام کی حمایت کرنا نسبتاً کم خطرناک ہو سکتا ہے، تاہم اس بیان پر عالمی سطح پر بحث جاری ہے۔
تجزیہ کاروں کے مطابق واشنگٹن اور تہران کے درمیان بڑھتی ہوئی لفظی کشیدگی کے باوجود پسِ پردہ سفارتی رابطے جاری ہیں، جبکہ خطے میں کسی بھی ممکنہ فوجی تصادم کے خدشات بدستور موجود ہیں۔
About The Author
