عالمی خبر رساں ادارے نے دعویٰ کیا ہے کہ ایران چین سے سپر سانک اینٹی شپ کروز میزائل خریدنے کے معاہدے کے قریب پہنچ گیا ہے۔ رپورٹ کے مطابق تہران بیجنگ سے CM-302 میزائل حاصل کرنا چاہتا ہے جس کی رینج تقریباً 290 کلو میٹر بتائی جاتی ہے۔
رپورٹ میں کہا گیا ہے کہ یہ میزائل سمندری دفاعی نظام سے بچنے کے لیے انتہائی کم بلندی پر تیز رفتار سے پرواز کرنے کی صلاحیت رکھتے ہیں، جس سے انہیں روکنا مشکل ہو جاتا ہے۔ تاہم ابھی تک میزائلوں کی فراہمی کی حتمی تاریخ طے نہیں کی گئی۔
ذرائع کے مطابق ایران اور چین کے درمیان اس دفاعی معاہدے پر بات چیت گزشتہ دو برس سے جاری تھی، تاہم اسرائیل کے ساتھ گزشتہ سال ہونے والی کشیدگی کے بعد مذاکرات میں تیزی آئی۔
دوسری جانب چینی وزارت خارجہ نے اس ممکنہ میزائل معاہدے سے لاعلمی کا اظہار کیا ہے، جبکہ ایران کی جانب سے بھی باضابطہ طور پر کوئی تصدیق سامنے نہیں آئی۔
دفاعی ماہرین کے مطابق اگر یہ معاہدہ طے پا جاتا ہے تو خلیج اور آبنائے ہرمز کے بحری توازن پر اس کے اہم اثرات مرتب ہو سکتے ہیں، کیونکہ سپر سانک اینٹی شپ میزائل خطے میں بحری جہازوں کے لیے ایک بڑا چیلنج سمجھے جاتے ہیں۔
About The Author
