برسلز:
یورپی کمیشن نے خبردار کیا ہے کہ اگر یورپی یونین اور امریکہ کے درمیان طے شدہ تجارتی معاہدے کی کسی شق کی خلاف ورزی ہوئی تو اس کا سخت جواب دیا جائے گا۔
چینی خبر رساں ادارے شنہوا کے مطابق، یورپی کمیشن کے نائب چیف ترجمان اولوف گل نے پریس بریفنگ میں بتایا کہ کمیشن امریکہ کی جانب سے شروع کی گئی "سیکشن 301” کی تحقیقات کا بغور جائزہ لے گا۔ یہ تحقیقات 16 معاشی اداروں کے خلاف ہیں، جن میں یورپی یونین بھی شامل ہے۔
اولوف گل نے کہا کہ یورپی کمیشن یقینی بنائے گا کہ یورپی یونین کے مفادات مکمل طور پر محفوظ رہیں، اور اس سلسلے میں امریکہ سے وضاحت بھی طلب کی جائے گی کہ یہ تحقیقات مشترکہ تجارتی فریم ورک کے ساتھ کس طرح مطابقت رکھتی ہیں۔ انہوں نے مزید کہا کہ اگر مشترکہ بیان میں کیے گئے وعدوں کی خلاف ورزی ہوئی تو کمیشن اس کا دوٹوک جواب دے گا۔
واضح رہے کہ گزشتہ سال جولائی میں یورپی یونین اور امریکہ کے درمیان ہونے والے تجارتی معاہدے کے تحت یورپی یونین نے امریکی صنعتی مصنوعات پر عائد تمام محصولات ختم کرنے اور امریکی زرعی و غذائی مصنوعات کے لیے ٹیرف ریٹ کوٹہ متعارف کرانے پر اتفاق کیا تھا۔ اس کے بدلے امریکہ نے یورپی یونین کی زیادہ تر برآمدات پر "15 فیصد ٹیرف کی حد” مقرر کرنے کا وعدہ کیا تھا۔
About The Author
