کراچی – پاکستانی شوبز انڈسٹری کی معروف اداکارہ Hajra Yamin نے اپنی فٹنس اور صحت مند طرزِ زندگی کا راز بیان کر دیا ہے۔
حاجرہ یامین نے حال ہی میں ایک نجی ٹی وی کے مزاحیہ پروگرام میں شرکت کے دوران مختلف موضوعات پر گفتگو کرتے ہوئے بتایا کہ وہ اپنی صحت اور فٹنس کا خاص خیال رکھتی ہیں۔ انہوں نے کہا کہ وہ روزانہ تقریباً دو گھنٹے ورزش کرتی ہیں، باقاعدگی سے وٹامنز استعمال کرتی ہیں اور اپنی خوراک پر خصوصی توجہ دیتی ہیں۔
اداکارہ کا کہنا تھا کہ جب اللہ تعالیٰ انسان کو نوازتا ہے اور زندگی میں آسانیاں آتی ہیں تو انسان خود بخود اچھا محسوس کرنے لگتا ہے اور اس کا اثر شخصیت پر بھی نظر آتا ہے۔
اپنے ابتدائی کیریئر کے حوالے سے انہوں نے بتایا کہ انہوں نے شروعات میں تھیٹر میں کام کیا اور وائس اوور کے ذریعے بھی آمدنی حاصل کرتی رہیں۔
حاجرہ یامین نے مزید کہا کہ انہیں ٹریکنگ اور ہائیکنگ کا بہت شوق ہے۔ انہوں نے ایک دلچسپ واقعہ سناتے ہوئے بتایا کہ ایک مرتبہ Shogran میں نائٹ ٹریکنگ کے دوران رات کے وقت ایسا محسوس ہوتا تھا جیسے کوئی قریب کھڑا ہو، مگر جب لائٹ ڈالی جاتی تو وہاں کوئی نظر نہیں آتا تھا، جبکہ رات کو سوتے وقت عجیب آوازیں بھی سنائی دیتی تھیں۔
تھیٹر کے حوالے سے گفتگو کرتے ہوئے انہوں نے پروڈیوسرز کو مشورہ دیا کہ وہ اصل اور معیاری کہانیاں لکھیں اور تھیٹر سے وابستہ نوجوان فنکاروں کو مناسب معاوضہ بھی دیں۔
ایک سوال کے جواب میں اداکارہ نے کہا کہ اگر انہیں کسی عالمی فنکار کا ٹیلنٹ اپنانے کا موقع ملے تو وہ ہالی ووڈ کی مشہور اداکارہ Meryl Streep کا ٹیلنٹ حاصل کرنا پسند کریں گی۔
About The Author
