یورپی یونین کی خارجہ پالیسی کی سربراہ Kaja Kallas نے کہا ہے کہ یونین امریکا اور ایران کے درمیان بڑھتی ہوئی کشیدگی کو کم کرنے کے لیے مختلف فریقوں سے رابطے میں ہے۔
العربیہ/ الحدث کو دیے گئے بیان میں انہوں نے کہا کہ یورپی یونین اس بات پر یقین رکھتی ہے کہ ایران کے ساتھ مسئلے کا حل بالآخر سفارت کاری کے ذریعے ہی ممکن ہے، اور اسی راستے سے خطے میں استحکام لایا جا سکتا ہے۔
کایا کلاس کے مطابق ایک جامع سفارتی حل نہ صرف موجودہ کشیدگی کو کم کر سکتا ہے بلکہ مستقبل میں پیدا ہونے والے خطرات اور تنازعات کو بھی روکنے میں مدد دے سکتا ہے۔
انہوں نے کہا کہ یورپی یونین اپنے علاقائی شراکت داروں کے ساتھ مسلسل رابطے میں ہے تاکہ جاری مذاکرات کو آگے بڑھانے کے لیے مشترکہ کوششیں کی جا سکیں۔
ان کے مطابق یورپی یونین کی سطح پر سعودی عرب سمیت دیگر ممالک کے ساتھ بھی مشاورت جاری ہے، جبکہ پاکستان اور مصر بھی اس سفارتی فریم ورک کا حصہ ہیں اور مختلف سطحوں پر بات چیت ہو رہی ہے۔
انہوں نے واضح کیا کہ فریقین کے درمیان اختلافات کافی گہرے ہیں، جس کے باعث موجودہ صورتحال کو حل کرنا آسان نہیں، تاہم سفارتی کوششیں جاری رکھی جائیں گی۔
تجزیہ کاروں کے مطابق یورپی یونین کا یہ کردار خطے میں کشیدگی کم کرنے اور امریکا و ایران کے درمیان ممکنہ مذاکرات کی راہ ہموار کرنے میں اہم ثابت ہو سکتا ہے۔
About The Author
