جنوبی لبنان میں اقوامِ متحدہ کے امن مشن کو دھچکا، مزید دو اہلکار ہلاک -

United Nations Interim Force in Lebanon (یونیفل) نے تصدیق کی ہے کہ جنوبی Lebanon میں ایک دھماکے کے نتیجے میں اس کے مزید دو امن اہلکار ہلاک ہو گئے ہیں۔

یونیفل کے مطابق پیر کے روز گاؤں بنی حیان کے قریب ایک نامعلوم نوعیت کے دھماکے نے امن مشن کی گاڑی کو نشانہ بنایا، جس کے نتیجے میں دو اہلکار موقع پر ہی ہلاک ہو گئے جبکہ دو دیگر زخمی ہوئے، جن میں سے ایک کی حالت تشویشناک بتائی جا رہی ہے۔

اقوامِ متحدہ کے اس مشن نے واقعے پر افسوس کا اظہار کرتے ہوئے کہا کہ امن کے قیام کیلئے کام کرنے والے اہلکاروں کی جانوں کا ضیاع ناقابل قبول ہے۔

یہ واقعہ ایک روز قبل پیش آنے والے ایک اور حملے کے بعد سامنے آیا ہے، جب جنوبی لبنان کے علاقے عادشیت القُصیر میں یونیفل کی ایک پوزیشن پر گولہ گرنے سے ایک اہلکار ہلاک ہو گیا تھا۔

یونیفل حکام کے مطابق حالیہ حملوں کے ذمہ داروں کا تعین تاحال نہیں ہو سکا، تاہم دونوں واقعات کی تحقیقات شروع کر دی گئی ہیں۔

مبصرین کے مطابق خطے میں بڑھتی ہوئی کشیدگی کے تناظر میں امن مشن پر حملے تشویشناک ہیں، جو نہ صرف سکیورٹی صورتحال کو مزید پیچیدہ بنا رہے ہیں بلکہ بین الاقوامی امن کوششوں کیلئے بھی بڑا چیلنج بن سکتے ہیں۔