فٹبال کی دنیا میں ایک اہم پیش رفت سامنے آئی ہے جہاں ترکیہ اور عراق نے طویل وقفے کے بعد فیفا ورلڈ کپ کے لیے کوالیفائی کر کے شائقین کو خوشی سے جھومنے پر مجبور کر دیا ہے۔
ترکیہ نے پلے آف فائنل میں کوسوو کے خلاف ایک سنسنی خیز مقابلے کے بعد 0-1 سے کامیابی حاصل کی۔ اس فتح کے ساتھ ہی ترکیہ نے 24 سال بعد ورلڈ کپ میں اپنی جگہ بنا لی۔ اس سے قبل ترکیہ آخری بار 2002 کے ورلڈ کپ میں شریک ہوا تھا، جہاں اس کی کارکردگی کو آج بھی یاد کیا جاتا ہے۔
اس تاریخی کامیابی کے بعد ترکیہ بھر میں جشن کا سماں دیکھنے میں آیا، شائقین سڑکوں پر نکل آئے اور قومی ٹیم کی کارکردگی کو بھرپور انداز میں سراہا گیا۔ عالمی فٹبال ماہرین بھی اس واپسی کو ایک اہم سنگ میل قرار دے رہے ہیں۔
دوسری جانب، عراق نے بھی شاندار کارکردگی کا مظاہرہ کرتے ہوئے انٹر کنفیڈریشن پلے آف میں بولیویا کو 1-2 سے شکست دے کر 40 سال بعد ورلڈ کپ کے لیے کوالیفائی کر لیا۔ عراق اس سے قبل صرف ایک بار 1986 میں میکسیکو میں ہونے والے ورلڈ کپ میں شریک ہوا تھا، جہاں اسے گروپ مرحلے میں تمام میچز میں شکست کا سامنا کرنا پڑا تھا۔
فٹبال کے عالمی منظرنامے میں ترکیہ اور عراق کی واپسی کو نہایت اہم قرار دیا جا رہا ہے، اور شائقین کو آئندہ ورلڈ کپ میں ان ٹیموں سے بہتر کارکردگی کی امید ہے۔
About The Author
