بنگلہ دیش بحریہ نے خلیجِ بنگال میں چار روز سے خراب کشتی کے ساتھ بھٹکنے والے 15 ماہی گیروں کو کامیاب ریسکیو آپریشن کے ذریعے بحفاظت نکال لیا۔
ترجمان کے مطابق یہ کارروائی 31 مارچ کو معمول کی بحری گشت کے دوران انجام دی گئی۔ گشتی ٹیم نے سینٹ مارٹن آئی لینڈ کے لائٹ ہاؤس سے تقریباً 6 بحری میل مغرب میں ایک خراب ماہی گیری ٹرالر کو دیکھا، جس کے بعد فوری طور پر امدادی کارروائی شروع کی گئی۔
ریسکیو کیے جانے والے ماہی گیروں نے بتایا کہ ان کے ٹرالر کا انجن 27 مارچ کو خراب ہو گیا تھا، جس کے باعث وہ گہرے سمندر میں پھنس گئے اور سمت کا تعین کرنے سے بھی قاصر رہے۔ اس دوران انہیں خوراک اور پینے کے صاف پانی کی شدید قلت کا سامنا رہا، جس سے ان کی مشکلات میں مزید اضافہ ہو گیا۔
بحریہ کے اہلکاروں نے تمام ماہی گیروں کو بحفاظت سینٹ مارٹن آئی لینڈ پر قائم نیول فارورڈ بیس منتقل کیا، جہاں انہیں خوراک، صاف پانی اور ابتدائی طبی امداد فراہم کی گئی۔ حکام کے مطابق تمام افراد کی حالت تسلی بخش ہے اور بعد ازاں انہیں ان کے اہل خانہ کے حوالے کر دیا گیا۔
بنگلہ دیش بحریہ کا کہنا ہے کہ وہ سمندری حدود میں سیکیورٹی کو یقینی بنانے، ماہی گیروں کے تحفظ اور ملکی “بلیو اکانومی” کے فروغ کے لیے باقاعدگی سے گشت جاری رکھے ہوئے ہے۔ یہ ریسکیو آپریشن اس کے انسانی ہمدردی کے عزم اور پیشہ ورانہ صلاحیتوں کا عملی مظہر ہے۔
About The Author
