پاکستان سپر لیگ (PSL) سیزن 11 کے نویں میچ میں اسلام آباد یونائیٹڈ نے عمدہ آل راؤنڈ کارکردگی کا مظاہرہ کرتے ہوئے کوئٹہ گلیڈی ایٹرز کو 8 وکٹوں سے شکست دے کر ایونٹ میں اپنی پہلی کامیابی حاصل کرلی۔
قذافی سٹیڈیم لاہور میں کھیلے گئے اس میچ میں کوئٹہ گلیڈی ایٹرز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں کے نقصان پر 183 رنز اسکور کیے۔ کوئٹہ کی جانب سے حسن نواز نے شاندار بلے بازی کرتے ہوئے 36 گیندوں پر 66 رنز کی ناقابلِ شکست اننگز کھیلی، جس میں 3 چھکے اور 6 چوکے شامل تھے۔ کپتان سعود شکیل نے 42 رنز بنائے جبکہ شمائل حسین نے 21، خواجہ نافع نے 18 اور بین ڈرموٹ نے 3 رنز اسکور کیے۔ بیون جیکبز بغیر کوئی رن بنائے آؤٹ ہوئے، جبکہ ٹام کرن نے 29 رنز کی ناٹ آؤٹ اننگز کھیلی۔
اسلام آباد یونائیٹڈ کی جانب سے بولنگ میں کپتان شاداب خان نمایاں رہے جنہوں نے 3 کھلاڑیوں کو آؤٹ کیا۔ سلمان ارشاد اور عماد وسیم نے ایک ایک وکٹ حاصل کی۔
184 رنز کے ہدف کے تعاقب میں اسلام آباد یونائیٹڈ نے جارحانہ انداز اپناتے ہوئے 19ویں اوور کی دوسری گیند پر صرف 2 وکٹوں کے نقصان پر ہدف حاصل کرلیا۔ سمیر منہاس نے شاندار بیٹنگ کرتے ہوئے 48 گیندوں پر 83 رنز کی اننگز کھیلی اور ناٹ آؤٹ رہے۔ کپتان شاداب خان نے بھی بہترین کھیل پیش کرتے ہوئے 39 گیندوں پر 69 رنز بنائے اور ناقابلِ شکست رہے۔ ڈیوون کانوے 18 رنز بنا کر آؤٹ ہوئے جبکہ آندرے گوس 2 رنز پر پویلین لوٹے۔
کوئٹہ گلیڈی ایٹرز کی جانب سے دونوں وکٹیں ابرار احمد نے حاصل کیں، تاہم ٹیم کو فتح دلانے میں ناکام رہے۔
اسلام آباد یونائیٹڈ کی اس جیت کے ساتھ ہی ٹیم نے ایونٹ میں اپنی مہم کا کامیاب آغاز کیا ہے اور پوائنٹس ٹیبل پر اپنی پوزیشن بہتر بنائی ہے۔
About The Author
