ایرانی اجازت سے فرانس کے پہلے بحری جہاز نے آبنائے ہرمز عبور کرلیا -

ایران پر امریکی و اسرائیلی حملوں کے بعد پہلی بار Strait of Hormuz سے ایک مغربی یورپی کمپنی سے منسلک بحری جہاز کے گزرنے کی اطلاعات سامنے آئی ہیں، جسے خطے میں بحری سرگرمیوں کی جزوی بحالی کے طور پر دیکھا جا رہا ہے۔

عالمی خبر رساں ادارے Bloomberg کے مطابق فرانسیسی شپنگ کمپنی CMA CGM سے وابستہ کنٹینر بردار جہاز CMA CGM Kribi نے آبنائے ہرمز کو عبور کیا۔ رپورٹ کے مطابق یہ جہاز ایرانی ساحل کے ساتھ سفر کرتے ہوئے عمان کے قریب کھلے سمندر میں داخل ہوا۔

میڈیا رپورٹس کے مطابق یہ معلومات جہازوں کی نگرانی کرنے والے ڈیٹا اور متعلقہ ذرائع سے حاصل کی گئی ہیں، جس سے ظاہر ہوتا ہے کہ محدود پیمانے پر بحری آمد و رفت بحال ہونا شروع ہو گئی ہے۔

دوسری جانب ایران نے حالیہ کشیدگی کے بعد آبنائے ہرمز میں نگرانی مزید سخت کر دی ہے۔ رپورٹس کے مطابق مخصوص جہازوں کو ہی گزرنے کی اجازت دی جا رہی ہے جبکہ مخالف ممالک سے منسلک بحری جہازوں کو سخت انتباہ جاری کیا گیا ہے۔

واضح رہے کہ Strait of Hormuz دنیا کی اہم ترین تجارتی گزرگاہوں میں شمار ہوتی ہے، جہاں سے عالمی سطح پر تیل اور گیس کی ترسیل کا تقریباً 20 فیصد حصہ گزرتا ہے۔ حالیہ تنازع کے باعث یہاں بحری ٹریفک میں نمایاں کمی دیکھی گئی، جس کے اثرات عالمی توانائی منڈیوں پر بھی پڑ رہے ہیں۔

ماہرین کے مطابق اس جہاز کا گزرنا اس بات کا اشارہ ہو سکتا ہے کہ سخت سکیورٹی کے باوجود محدود سطح پر بحری تجارت بحال ہونے لگی ہے، تاہم صورتحال بدستور غیر یقینی کا شکار ہے۔