امریکی ریاست فلوریڈا کے گورنر Ron DeSantis نے ایک نئے قانون پر دستخط کر دیے ہیں جس کے تحت ایسے غیر ملکی اور مذہبی قوانین، بشمول شریعہ قانون، پر پابندی عائد کی گئی ہے جو ریاستی آئین یا شہری حقوق سے متصادم ہوں۔
HB 1471 نامی اس قانون کے مطابق فلوریڈا میں صرف وہی قانونی نظام قابلِ قبول ہوگا جو امریکی آئین اور ریاستی قوانین کے مطابق ہو۔ حکام کا کہنا ہے کہ اس اقدام کا مقصد ریاست میں قانونی یکسانیت برقرار رکھنا اور شہریوں کے آئینی حقوق کا تحفظ یقینی بنانا ہے۔
گورنر ڈی سانٹیس نے اس موقع پر کہا کہ قانون کی بالادستی کو یقینی بنانے کے لیے ضروری ہے کہ ریاست ایک واضح اور متحدہ قانونی نظام کے تحت کام کرے۔ ان کا کہنا تھا کہ آئین ہی ریاست کا حتمی قانون ہونا چاہیے اور کسی بھی متبادل قانونی نظام کو اس پر فوقیت نہیں دی جا سکتی۔
انہوں نے مزید کہا کہ ریاستی اداروں اور تعلیمی نظام کو ایسے عناصر سے محفوظ رکھنا ضروری ہے جو امریکی قوانین اور اقدار کے خلاف سرگرم ہو سکتے ہیں۔ اس قانون کے حامیوں کے مطابق یہ اقدام عوام کو ممکنہ خطرات، خصوصاً انتہا پسند گروہوں سے تحفظ فراہم کرنے کے لیے کیا گیا ہے۔
تاہم ناقدین اس قانون کو متنازع قرار دیتے ہوئے کہتے ہیں کہ اس سے مذہبی آزادیوں پر اثر پڑ سکتا ہے اور یہ مخصوص کمیونٹیز کو نشانہ بنانے کے مترادف ہو سکتا ہے۔ قانونی ماہرین کے مطابق اس قانون کے اثرات اور اس پر ممکنہ عدالتی چیلنجز آنے والے دنوں میں واضح ہوں گے۔
About The Author
