پاکستان کرکٹ ٹیم کے سابق کپتان یونس خان نے Pakistan Cricket Board کے تعاون سے سندھ میں کرکٹ کے فروغ کی ذمہ داری سنبھال لی ہے، جس کا مقصد صوبے میں نئے ٹیلنٹ کو تلاش کرنا اور اسے پیشہ ورانہ سطح پر آگے لانا ہے۔
تفصیلات کے مطابق یونس خان سندھ حکومت کے ساتھ مل کر نوجوان کرکٹرز کے لیے مواقع پیدا کریں گے اور اس سلسلے میں کرکٹ اکیڈمیز کے قیام، کوچنگ سہولیات کی بہتری اور گراس روٹ لیول پر کھیل کو فروغ دینے کے اقدامات کیے جائیں گے۔ اس مشن میں دیگر معروف سابق کرکٹرز بھی ان کے ہمراہ ہوں گے۔
اس حوالے سے یونس خان نے سندھ کے وزیر کھیل و امور نوجوانان سردار محمد بخش مہر سے ملاقات کی، جس میں انہوں نے صوبے میں کرکٹ کے فروغ کے لیے مختلف تجاویز پیش کیں۔ ان تجاویز میں جدید طرز کی اکیڈمیز کے قیام اور باصلاحیت کھلاڑیوں کو معیاری کوچنگ فراہم کرنا شامل ہے۔
وزیر کھیل سردار محمد بخش مہر نے یونس خان کے اس اقدام کو سراہتے ہوئے یقین دہانی کرائی کہ ان تجاویز کو عملی جامہ پہنایا جائے گا۔ انہوں نے کہا کہ پی سی بی کے تعاون سے سندھ کرکٹ ٹیم کو مزید مضبوط بنانے کے لیے بھی اقدامات جاری ہیں۔
حکام کے مطابق اس منصوبے میں سابق عظیم کرکٹرز جاوید میانداد، راشد لطیف اور معین خان سمیت دیگر شخصیات سے بھی مشاورت اور معاونت حاصل کی جائے گی، تاکہ صوبے میں کرکٹ کے معیار کو مزید بلند کیا جا سکے۔
About The Author
