لاہور سیشن کورٹ میں یوٹیوبر رجب بٹ اور دیگر ملزمان کے خلاف مبینہ زیادتی کیس میں اہم پیش رفت سامنے آئی ہے، جہاں عدالت نے فردِ جرم عائد کرنے کے لیے 22 اپریل کی تاریخ مقرر کر دی۔
کیس کی سماعت ایڈیشنل سیشن جج یاسر عرفات نے کی، جس کے دوران عدالت نے ملزمان کو چالان کی نقول فراہم کیں تاکہ وہ آئندہ کارروائی کے لیے تیار ہو سکیں۔
عدالت نے حکم دیا کہ رجب بٹ سمیت دیگر نامزد ملزمان کو 22 اپریل کو فردِ جرم عائد کرنے کے لیے طلب کیا جائے، جس کے بعد کیس باقاعدہ ٹرائل کے مرحلے میں داخل ہو جائے گا۔
دوسری جانب درخواست گزار نے مؤقف اختیار کیا ہے کہ تھانہ نواب ٹاؤن پولیس نے مقدمہ حقائق کے برعکس درج کیا ہے، اور عدالت سے عبوری ضمانت کی توثیق کی استدعا کی ہے۔
متاثرہ خاتون کے مطابق ملزمان نے اسے گھر بلا کر مبینہ طور پر زیادتی کا نشانہ بنایا۔ مقدمے میں نامزد افراد میں رجب بٹ کے علاوہ جہانگیر، جواد علی اور عبد الرحمان شامل ہیں۔
قانونی ماہرین کے مطابق آئندہ سماعت اس کیس میں انتہائی اہمیت کی حامل ہوگی، جہاں فردِ جرم عائد ہونے کے بعد باقاعدہ ٹرائل کا آغاز ہوگا اور شواہد کی بنیاد پر کیس آگے بڑھے گا۔
About The Author
