پاکستان ہاکی فیڈریشن نے بڑا اقدام اٹھاتے ہوئے نیشنل انڈر 18 یوتھ ہاکی گیمز میں شرکت کے خواہشمند 9 کھلاڑیوں کو عمر میں غلط بیانی اور زائد العمر ہونے کی بنیاد پر نااہل قرار دے دیا ہے۔
ترجمان کے مطابق یہ فیصلہ فیڈریشن کی سکروٹنی کمیٹی کی جانب سے کیے گئے سخت تصدیقی عمل کے بعد کیا گیا، جس میں نادرا کے فیملی رجسٹریشن سرٹیفکیٹ (FRC) کی مدد سے کھلاڑیوں کی عمر کی جانچ پڑتال کی گئی۔
تحقیقات کے دوران یہ بات سامنے آئی کہ مذکورہ کھلاڑی مقررہ عمر کی حد سے تجاوز کر چکے تھے، جس کے باعث انہیں ایونٹ میں شرکت سے روک دیا گیا۔ فیڈریشن کا کہنا ہے کہ اس اقدام کا مقصد نوجوان سطح پر شفافیت کو یقینی بنانا اور حقیقی اہل کھلاڑیوں کو آگے آنے کا موقع فراہم کرنا ہے۔
ترجمان پاکستان ہاکی فیڈریشن نے واضح کیا کہ ادارہ میرٹ، شفافیت اور منصفانہ مقابلے کے اصولوں پر سختی سے کاربند ہے اور کسی بھی قسم کی خلاف ورزی کو برداشت نہیں کیا جائے گا۔
کھیلوں کے ماہرین کے مطابق یہ اقدام پاکستان میں جونیئر سطح پر ہاکی کے نظام کو بہتر بنانے اور ٹیلنٹ کی درست نشاندہی کے لیے ایک اہم قدم قرار دیا جا رہا ہے، جو مستقبل میں قومی ٹیم کے لیے مضبوط بنیاد فراہم کر سکتا ہے۔
About The Author
