ایرانی فوج کی سخت وارننگ: بندرگاہوں کو خطرہ ہوا تو پورا خطہ محفوظ نہیں رہے گا -

ایرانی فوج کے ترجمان نے سخت بیان جاری کرتے ہوئے خبردار کیا ہے کہ اگر ایران کی بندرگاہوں کو کسی بھی قسم کا خطرہ لاحق ہوا تو پورے خطے کی بحری تنصیبات بھی محفوظ نہیں رہیں گی۔

ترجمان کے مطابق خلیجی بندرگاہیں یا تو سب کے لیے محفوظ ہوں گی یا پھر کسی کے لیے بھی محفوظ نہیں رہیں گی، جو خطے میں بڑھتی ہوئی کشیدگی کی واضح علامت ہے۔

انہوں نے الزام عائد کیا کہ بین الاقوامی پانیوں میں بحری جہازوں پر امریکی پابندیاں غیر قانونی ہیں اور ان اقدامات کو “بحری قزاقی” کے مترادف قرار دیا۔

بیان میں مزید کہا گیا کہ امریکی دھمکیوں کے بعد ایران آبنائے ہرمز پر مکمل کنٹرول کے لیے ایک نیا مستقل نظام نافذ کرنے جا رہا ہے، جس کے تحت سمندری نقل و حرکت کو منظم کیا جائے گا۔

ایرانی ترجمان نے واضح کیا کہ ملک اپنے قومی مفادات کے تحفظ کے لیے ہر ممکن قدم اٹھائے گا اور اگر اس کی بندرگاہوں یا بحری راستوں کو نشانہ بنایا گیا تو اس کے اثرات پورے خطے پر مرتب ہوں گے۔