ایران کے اسرائیل پر میزائل حملوں کے بعد عالمی مارکیٹ میں خام تیل 75 ڈالر سے تجاوز کر گیا۔ مشرق وسطیٰ میں کشیدگی بڑھنے سے خام تیل کی قیمت میں 2 فیصد اضافہ ہوا۔ ایک بیرل خام تیل 1.63 ڈالر مہنگا ہو کر 75 ڈالر 19 سینٹس میں ٹریڈ ہو رہا ہے۔
امریکی خام تیل کی قیمت میں 1.70 ڈالر کا اضافہ ہوا۔ ویسٹ ٹیکسس انٹرمیڈیٹ کا ریٹ 71.53 ڈالر پر پہنچ گیا۔
ٹریڈرز کے مطابق مشرق وسطیٰ میں جنگ کا دائرہ وسیع ہوتا جا رہا ہے۔ اسرائیل کے غزہ کے بعد لبنان، شام اور یمن پر حملوں سے تشویش بڑھتی جا رہی ہے۔ خدشہ ہے جنگ کی طوالت سے مشرق وسطیٰ سے تیل کی رسد میں رکاوٹیں آنا شروع ہو جائیں گی۔
ایران کا کہنا ہے کہ تل ابیب پر مزید حملوں کا ارادہ نہیں ہے تاہم اسرائیل نے ایران پر جوابی حملوں کی دھمکی دی ہے۔
