ماسکو — عالمی سطح پر مقبول میسجنگ پلیٹ فارم واٹس ایپ، جو میٹا پلیٹ فارمز کی ملکیت ہے، نے روسی حکام پر الزام عائد کیا ہے کہ وہ شہریوں کے محفوظ اور نجی مواصلات کے حق کو محدود کرنے کے لیے اس کی سروس بلاک کرنے کی کوشش کر رہے ہیں۔
کمپنی نے اپنے بیان میں کہا کہ اس کی اینڈ ٹو اینڈ انکرپشن ٹیکنالوجی صارفین کی پرائیویسی کو محفوظ رکھتی ہے اور کسی بھی حکومتی نگرانی کو روکتی ہے — اور یہی وجہ ہے کہ روسی حکام اس پلیٹ فارم کو نشانہ بنا رہے ہیں۔ روس میں اس وقت واٹس ایپ کے 10 کروڑ سے زائد صارفین موجود ہیں۔
حالیہ ہفتوں میں، روسی ریگولیٹرز نے واٹس ایپ اور ٹیلیگرام کی کچھ کالز پر پابندی عائد کر دی ہے۔ ان کا مؤقف ہے کہ یہ غیر ملکی ملکیت والے پلیٹ فارمز دہشت گردی اور فراڈ کے کیسز میں قانون نافذ کرنے والے اداروں کے ساتھ مطلوبہ ڈیٹا شیئر کرنے سے انکار کرتے ہیں۔”واٹس ایپ نجی اور اینڈ ٹو اینڈ انکرپٹڈ ہے، اور ہم محفوظ مواصلات کے حق پر کسی بھی قسم کی قدغن کی مزاحمت کرتے ہیں،” کمپنی نے کہا۔ "ہم پرعزم ہیں کہ روس سمیت دنیا بھر میں انکرپٹڈ میسجنگ تک رسائی برقرار رکھی جائے۔”
ماہرین کے مطابق، یہ تنازعہ ڈیجیٹل پرائیویسی کے حامیوں اور ان حکومتوں کے درمیان بڑھتے ہوئے تناؤ کی تازہ مثال ہے جو آن لائن کمیونیکیشن پر زیادہ کنٹرول چاہتی ہیں۔
