لاہور – پاکستان کرکٹ بورڈ (PCB) نے جنوبی افریقہ کے خلاف پہلے ٹی 20 میچ کے لیے قومی ٹیم کی خصوصی پنک تھیم کٹ متعارف کرائی ہے۔
پی سی بی کے مطابق، راولپنڈی میں 28 اکتوبر کو شیڈول پہلے ٹی 20 میں قومی کرکٹرز پنک جرسی پہن کر بریسٹ کینسر آگاہی مہم "PINKtober” کا حصہ بنیں گے۔ اس موقع پر امپائرز، کمنٹیٹرز اور گراؤنڈ اسٹاف بھی پنک ربن کے ذریعے اس مہم کی حمایت کریں گے۔
پی سی بی کے چیف ایگزیکٹیو آفیسر سمیر احمد سید نے کہا کہ "ہمیں فخر ہے کہ کرکٹ جیسے مقبول کھیل کو معاشرتی آگاہی کے فروغ کے لیے استعمال کیا جا رہا ہے۔ بروقت تشخیص بے شمار جانیں بچا سکتی ہے۔”
میچ میں استعمال ہونے والے سٹمپس پر پنک برانڈنگ کی گئی ہے، جبکہ میدان کے اطراف بریسٹ کینسر سے متعلق آگاہی پیغامات بھی دکھائے جائیں گے۔
یہ پہلا موقع ہے کہ پاکستان کرکٹ بورڈ نے کسی بین الاقوامی میچ میں بریسٹ کینسر آگاہی مہم کو شامل کیا ہے۔ اس سے قبل ایسے "پنک ڈے” ایونٹس صرف پاکستان سپر لیگ (PSL) کے دوران منعقد کیے جاتے تھے۔
جنوبی افریقہ کے خلاف ٹی 20 سیریز کا دوسرا اور تیسرا میچ بالترتیب 31 اکتوبر اور 1 نومبر کو لاہور میں کھیلا جائے گا، جبکہ تین ون ڈے میچوں کی سیریز 4 سے 8 نومبر تک فیصل آباد میں جاری رہے گی۔
