پاکستان ہاکی کی ترقی اور بحالی کے لیے ایک اہم پیش رفت سامنے آئی ہے جہاں پاکستان ہاکی فیڈریشن (پی ایچ ایف) اور پاکستان عرب ریفائنری کمپنی (پارکو) کے درمیان ہاکی کوچز کی تربیت کے پروگرام کے لیے مفاہمتی یادداشت (ایم او یو) پر دستخط کر دیے گئے۔
معاہدے پر دستخط کی تقریب میں صدر پاکستان ہاکی فیڈریشن محی الدین وانی اور پارکو کے منیجنگ ڈائریکٹر مرتضیٰ قریشی نے دستخط کیے، جبکہ وفاقی سیکرٹری پیٹرولیم عابد یعقوب اور ذیشان نقوی بھی اس موقع پر موجود تھے۔
تقریب سے خطاب کرتے ہوئے صدر پی ایچ ایف محی الدین وانی نے کہا کہ قومی کھیل ہاکی کی ترقی اور اسے دوبارہ عالمی سطح پر نمایاں مقام دلانے کے لیے عملی اقدامات کیے جا رہے ہیں۔ انہوں نے کہا کہ اس مقصد کے حصول کے لیے تمام متعلقہ اداروں اور اسٹیک ہولڈرز کو اپنا کردار ادا کرنا ہوگا۔
محی الدین وانی نے بتایا کہ کوچز کی تربیت کا پروگرام ملک بھر میں مرحلہ وار شروع کیا جائے گا تاکہ جدید تقاضوں اور بین الاقوامی معیار کے مطابق کوچنگ کے نظام کو بہتر بنایا جا سکے۔ ان کا کہنا تھا کہ پاکستان ہاکی فیڈریشن جونیئر سطح پر ٹیلنٹ کی ترقی پر خصوصی توجہ دے رہی ہے اور ہاکی کے کھوئے ہوئے وقار کی بحالی کے لیے تمام دستیاب وسائل بروئے کار لائے جا رہے ہیں۔
وفاقی سیکرٹری پیٹرولیم عابد یعقوب نے تقریب سے خطاب کرتے ہوئے کہا کہ پارکو قومی کھیل کی سرپرستی ایک مثبت اور تعمیری مقصد کے تحت کر رہی ہے۔ انہوں نے امید ظاہر کی کہ مشترکہ کاوشوں کے نتیجے میں پاکستان ہاکی ایک مرتبہ پھر بین الاقوامی سطح پر اپنی شناخت بحال کرنے میں کامیاب ہوگی۔
بعد ازاں میڈیا سے گفتگو کرتے ہوئے محی الدین وانی نے کہا کہ قومی ہاکی ٹیم کی ایف آئی ایچ پرو لیگ اور آئندہ ورلڈ کپ کی تیاریوں کے لیے کھلاڑیوں کو بین الاقوامی معیار کی تربیت فراہم کی گئی ہے۔ انہوں نے کہا کہ ٹیم کی کارکردگی میں بہتری کا عمل جاری ہے اور موجود خامیوں کو دور کرنے کے لیے مسلسل کام کیا جا رہا ہے۔
انہوں نے مزید انکشاف کیا کہ جنوبی کوریا کی ہاکی ٹیم کو پاکستان آنے کی دعوت دی جا رہی ہے۔ کورین ٹیم پاکستان کی سینئر اور جونیئر ہاکی ٹیموں کے خلاف میچز کھیلے گی، جس سے قومی کھلاڑیوں کو قیمتی بین الاقوامی تجربہ حاصل ہوگا اور ٹیم کی تیاریوں میں مزید بہتری آئے گی۔
About The Author
