پاکستان، سعودی عرب اور ترکیہ کے مکہ دفاعی اتحاد کو ادارہ جاتی شکل دینے پر پیشرفت جاری ہے۔تینوں ممالک نے اتحاد کے تحت تعاون کو مزید مضبوط بنانے پر اتفاق کیا ہے۔ اس مقصد کے لیے سعودی عرب میں سیکرٹریٹ قائم کیا جائے گا۔
ترک وزیر خارجہ ہاکان فیدان کے مطابق اتحاد کا پہلا سیکریٹری جنرل پاکستان سے ہوگا۔سرکاری مشترکہ بیان کے مطابق سیکریٹریٹ کی سربراہی ابتدائی طور پر پاکستانی سیکرٹری جنرل کریں گے۔ ان کی مدت تین سال ہوگی۔ ریڈیو پاکستان کے مطابق سیکریٹریٹ ریاض میں قائم کیا جائے گا۔
31 اگست کو استنبول میں مکہ معاہدے کے تحت اسٹریٹجک سیاسی و دفاعی کمیٹی کا پہلا اجلاس ہوا۔اجلاس میں پاکستان، سعودی عرب اور ترکیہ کے وزرائے خارجہ، وزرائے دفاع اور عسکری قیادت نے شرکت کی۔
تینوں ممالک نے دفاعی تعاون کو مزید ادارہ جاتی شکل دینے پر اتفاق کیا۔ مشترکہ بیان میں اجتماعی دفاع اور تعاون کو مضبوط بنانے پر بھی زور دیا گیا۔
تینوں ممالک مشترکہ سرگرمیوں کے ذریعے دفاعی صلاحیتیں مضبوط کریں گے۔اس کے علاوہ دفاعی صنعت میں تعاون بڑھانے پر بھی اتفاق کیا گیا ہے۔ مشترکہ ٹیکنالوجی کی تیاری اور پیداوار بھی اس تعاون کا حصہ ہوگی۔
ہاکان فیدان کے مطابق مکہ دفاعی اتحاد علاقائی امن، سلامتی اور استحکام کے لیے کام کرے گا۔ انہوں نے یہ بھی کہا کہ اتحاد کسی مخصوص ملک کے خلاف نہیں ہے۔
About The Author
