جنوبی کوریا کی پارلیمنٹ نے قائم مقام صدر ہان ڈک سو کا مواخذہ کر دیا، جس سے ملک کے سیاسی بحران میں مزید شدت آ گئی ہے۔ یہ اقدام سابق صدر یون سک یول کے متنازعہ مارشل لاء کے نفاذ کے بعد پیدا ہونے والی صورتحال کا تسلسل ہے، جس کی وجہ سے یون کا خود بھی مواخذہ ہوا تھا۔قومی اسمبلی میں اپوزیشن کی قیادت میں مواخذہ 192-0 ووٹوں سے منظور ہوا، جبکہ پیپلز پاور پارٹی (پی پی پی) نے اس عمل کا بائیکاٹ کیا۔مواخذے کی منظوری کے بعد ہان ڈک سو کے اختیارات معطل کر دیے گئے ہیں، اور اب ان کی قسمت کا فیصلہ آئینی عدالت کرے گی، جس کے پاس چھ ماہ کا وقت ہے۔ہان ڈک سو اور اپوزیشن کے درمیان آئینی عدالت کے تین نئے ججوں کی تقرری پر شدید اختلافات جاری ہیں۔ یہ جج سابق صدر یون کے مواخذے کا بھی فیصلہ کریں گے۔
آئینی عدالت کی آئندہ سماعت نہ صرف ہان ڈک سو بلکہ سابق صدر یون کے سیاسی مستقبل کا بھی تعین کرے گی۔ اس بحران نے جنوبی کوریا کے جمہوری اداروں پر سوالیہ نشان لگا دیا ہے اور حکومت و اپوزیشن کے درمیان کشیدگی کو عروج پر پہنچا دیا ہے۔
About The Author
