وزیراعلیٰ پنجاب مریم نواز شریف سے متحدہ عرب امارات کے سفیر حماد عبید ابراہیم الزعابی نے اہم ملاقات کی۔ ملاقات میں دونوں ممالک کے درمیان دوطرفہ تعاون کو مزید وسعت دینے کے لیے متعدد اقدامات پر تبادلہ خیال کیا گیا۔
پنجاب اور متحدہ عرب امارات کا ورکنگ گروپ قائم کرنے کا فیصلہ کیا گیا تاکہ دوطرفہ معاشی اور ترقیاتی منصوبوں کو آگے بڑھایا جا سکے۔پنجاب میں سرمایہ کاری کے لیے یو اے ای کے سرمایہ کاروں کو خصوصی مراعات کی پیشکش کی گئی۔
وزیراعلیٰ مریم نواز شریف نے یو اے ای کے سرمایہ کاروں کو پنجاب میں سرمایہ کاری کے لیے دعوت دی اور سازگار ماحول فراہم کرنے کی یقین دہانی کرائی۔انہوں نے یو اے ای کی پاکستان کی سماجی و اقتصادی ترقی میں کردار کو سراہا اور انفراسٹرکچر، صحت، تعلیم، اور توانائی جیسے شعبوں میں معاونت پر شکریہ ادا کیا۔
سفیر حماد عبید ابراہیم الزعابی نے وزیراعلیٰ کے کامیاب دورہ چین پر مبارکباد دی اور پنجاب حکومت کے ترقیاتی اقدامات اور موسمیاتی تبدیلیوں سے نمٹنے کے اقدامات کی تعریف کی۔انہوں نے کہا کہ یو اے ای ترقی یافتہ پاکستان کے سفر میں حکومت اور عوام کے ساتھ کھڑا ہے اور پنجاب میں مزید پراجیکٹس پر کام کرنے کا خواہاں ہے۔
وزیراعلیٰ مریم نواز نے کہا کہ "پاکستان اور متحدہ عرب امارات کے تعلقات باہمی اعتماد اور احترام پر مبنی ہیں، اور دونوں ممالک علاقائی استحکام اور خوشحالی کے لیے یکساں سوچ رکھتے ہیں۔”
یو اے ای کے سفیر نے کہا کہ حکومت پنجاب کے ساتھ پبلک پرائیویٹ پارٹنرشپ کے ذریعے دیرپا ترقی کو فروغ دینے کے لیے پُرعزم ہیں۔
