اسلام آباد: ایس آئی ایف سی کی سہولت کاری کے باعث ملک میں نئی کمپنیوں کی رجسٹریشن میں تاریخی اضافہ ہوگیا۔
ایس آئی ایف سی نئی کمپنیوں کی رجسٹریشن کے لیے ایک معاون اور سازگار ماحول فراہم کرنے کے لیے کوشاں ہے،سکیورٹیز اینڈ ایکسچینج کمیشن آف پاکستان نے جنوری 2025 میں 3 ہزار 442 نئی کمپنیوں کی رجسٹریشن کا ریکارڈ قائم کیا۔
یہ ریکارڈ پچھلے سال کی ماہانہ اوسط سے 39 فیصد زیادہ ہے جو کہ خوش آئند ہے، انفارمیشن ٹیکنالوجی اور ای کامرس کے شعبے میں 652 نئی کمپنیاں رجسٹر ہوئیں،ٹریڈنگ سیکٹر میں 463، سروسز میں 411 اور ریئل سٹیٹ و کنسٹرکشن میں 311 نئی کمپنیاں شامل ہوئیں۔
اسی طرح سیاحت، ٹرانسپورٹ، فوڈ اینڈ بیوریجز، ہیلتھ کیئر اور دیگر شعبوں میں بھی بتدریج نئی کمپنیوں کی رجسٹریشن میں اضافہ ہوا ہے۔
معاشی ماہرین کا کہنا ہے کہ کمپنیز رجسٹریشن میں اضافہ پاکستان کے بڑھتے ہوئے کاروباری ماحول اور سرمایہ کاروں کے بڑھتے اعتماد کا واضح اشارہ ہے،ایس آئی ایف سی کی معاونت سے ایس ای سی پی کا یہ تاریخی سنگ میل کاروبار دوست ماحول ، ڈیجیٹل تبدیلی اور آسان رجسٹریشن کے عمل کی فراہمی کا عکاس ہے۔
