انٹرنیشنل کرکٹ کونسل کے صدر جے شاہ کی پاکستان دشمنی کھل کر سامنے آ گئی۔۔۔ چیمپینز ٹرافی کے کامیاب انعقاد پر میزبان پاکستان کا نام لئے بغیر چیمپینز ٹرافی کے کامیاب انعقاد پر شکریئے کا پیغام جاری کیا۔۔
سماجی رابطے کی ایپ ایکس پر اپنے پیغام میں بھارتی شہری اور انڈین کرکٹ کونسل کے سابق سربراہ اور آئی سی سی کے موجودہ صدر جے شاہ نے کہا چیمپئنز ٹرافی آئی سی سی کے لیے بڑی کامیاب رہی، تمام ٹیموں اور میزبان ممالک کا شکریہ ادا کرنا چاہتا ہوں۔
جے شاہ نے ٹوئٹ میں میزبان لکھا، پاکستان کا نام نہیں لیا۔۔۔انہوں نے کہا کہ فینز نے بھی چیمپئنز ٹرافی کو کامیاب بنانے میں بھرپور کردار ادا کیا۔
آئی سی سی کے چیف ایگزیکٹو جیف آلڈرائس نے بھی چیمپئنز ٹرافی کی کامیاب میزبانی پرشکریہ ادا کیا۔
انہوں نے کہا کہ چیمپئنز ٹرافی کی کامیاب میزبانی پر پی سی بی کا شکریہ ادا کرتے ہیں، ایمریٹس کرکٹ بورڈ کا پانچ میچز کی میزبانی پر شکریہ ادا کرتے ہیں۔
ان کا کہنا تھاکہ 1996 کے بعد یہ پاکستان میں کھیلا جانے والا پہلا ملٹی ٹیم ٹورنامنٹ تھا اور یہ ایونٹ پاکستان کیلئے بڑی اہمیت کا حامل تھا، اسٹیڈیمزکی تزئین وآرائش اور ٹیموں کی شاندار میزبانی پرفخرہے۔
خیال رہے کہ چیمپئنز ٹرافی کا فائنل دبئی میں ہوا تھا اور بھارت فاتح رہا۔ چیمپئنز ٹرافی کا میزبان پاکستان تھا تاہم بھارتی حکومت کی ہٹ دھرمی کے باعث بھارتی ٹیم پاکستان نہیں آئی اور اپنے میچ دبئی میں کھیلے۔
