پاکستان نے بھارتی میڈیا کی جانب سے پٹھان کوٹ، جیسلمیر اور سری نگر پر حملے کرنے کے الزامات کو سختی سے مسترد کر دیا
ترجمان دفترخارجہ شفقت علی خان نے کہا ہے یہ دعوے بے بنیاد، سیاسی محرکات پر مبنی اور پاکستان کو بدنام کرنے کی مذموم مہم کا حصہ ہیں۔۔ بغیر کسی معتبر تحقیقات کے پاکستان پر مسلسل الزامات کا رجحان عکاسی کرتا ہے کہ بھارت ایک سوچے سمجھے منصوبے کے تحت جارحیت کے بہانے تراش رہا ہے۔۔
ترجمان دفتر خارجہ کے مطابق بھارت خطے کو مزید غیر مستحکم کر رہا ہے۔۔ ایسے اقدامات نہ صرف علاقائی امن کو خطرے میں ڈالتے ہیں بلکہ سیاسی اور عسکری مقاصد کے لیے غلط معلومات کے استعمال کے رجحان کو بھی آشکار کرتے ہیں۔۔
پاکستان عالمی برادری سے اپیل کرتا ہے کہ اس خطرناک طرز عمل کا سنجیدگی سے نوٹس لے۔۔عالمی برادری بھارت کو تحمل اور ذمہ داری کا مظاہرہ کرنے کی تلقین کرے۔
شفقت علی خان نے کہا جھوٹے الزامات کی بنیاد پر کسی بھی قسم کی جارحیت کا بھرپور جواب دیا جائے گا۔۔ پاکستان اپنی خودمختاری اور علاقائی سالمیت کے دفاع کے لیے پوری قوت سے تیار ہے۔۔
پاکستان امن کے لیے پرعزم ہے۔۔تاہم پاکستان کسی بھی اشتعال انگیزی، دھمکی یا گمراہ کن معلومات کے خلاف ردعمل دینے کا حق محفوظ رکھتا ہے۔۔
