تہران : اسرائیل کی فوج نے تہران میں اہم ایرانی شخصیت کو ڈرون حملے میں نشانہ بنانے کا دعویٰ کیا ہے۔
غیر ملکی میڈیا رپورٹس کے مطابق اسرائیل نے ایران میں ایک شخصیت کو ڈرون حملے میں نشانہ بنانے کا دعویٰ کیا ہے، تاہم جب اسرائیلی فوج کے ترجمان سے پوچھا گیا کہ کیا ڈرون حملے میں آیت اللہ علی خامنہ ای کو نشانہ بنایا گیا ہے تو اسرائیلی ترجمان کا کہنا تھا کہ میں اس سوال کی وضاحت نہیں کروں گا۔
یروشلم پوسٹ کے مطابق آئی ڈی ایف کے ترجمان بریگیڈیئر جنرل ایفی ڈیفرین نے ہفتے کی شام کہا کہ جمعہ کو شروع ہونے والے آپریشن رائزنگ لائن میں اسرائیل نے 150 سے زیادہ اہداف اور 400 سے زیادہ مختلف اجزا کو نشانہ بنایا ہے۔
ڈیفرین نے کہا کہ حملوں میں میزائل انفراسٹرکچر، فضائی دفاعی نظام اور جوہری تنصیبات کو نشانہ بنایا گیا، تاہم جب ایک صحافی نے سوال کیا کہ آیا ایرانی سپریم لیڈر آیت اللہ علی خامنہ ای اسرائیل کے حملوں کے اہداف میں سے ایک تھے، تو ترجمان نے کہا کہ وہ اسے ظاہر نہیں کر سکتے۔
دوسری جانب اسرائیل کے ایک سینئر عہدیدار نے کہا ہے کہ ایران کے سپریم لیڈر آیت اللہ علی خامنہ ای پر حملے کو بھی اسرائیل کی حکمتِ عملی سے خارج نہیں کیا گیا، دی یروشلم پوسٹ کے مطابق ایک اسرائیلی عہدیدار نے ہفتہ کے روز امریکی اخبار ’وال اسٹریٹ جرنل‘ سے بات کرتے ہوئے کہا کہ آیت اللہ علی خامنہ ای اسرائیل کی ایران کے جوہری پروگرام کو تباہ کرنے کی کوششوں میں ’ناقابلِ ہدف‘ نہیں ہیں۔
