واشنگٹن : امریکی صدر ڈونلڈ ٹرمپ آج فیلڈ مارشل عاصم منیر کے اعزاز میں ظہرانہ دیں گے۔
ترجمان وائٹ ہاؤس کے مطابق ظہرانہ کیبنٹ روم میں دیاجائے گا۔ فیلڈ مارشل عاصم منیر کی ظہرانے پر امریکی صدر ڈونلڈ ٹرمپ سے اہم ملاقات ہوگی۔
قبل ازیں پاک فوج کے سربراہ فیلڈ مارشل سید عاصم منیر کے اعزاز میں دورہ امریکا کے دوران شاندار استقبالیہ تقریب منعقد کی گئی۔ واشنگٹن میں اوورسیز پاکستانی کمیونٹی نے سپہ سالار کا پُرتپاک خیرمقدم کیا۔ آپریشن بنیان مرصوص میں پاک فوج کی بہادری کو بھرپور خراجِ تحسین پیش کیا گیا۔
فیلڈ مارشل سید عاصم منیر نے بیرونِ ملک مقیم پاکستانیوں کے کردار کو سراہتے ہوئے کہا کہ وہ پاکستان کے حقیقی سفیر ہیں ۔ جو پاکستانی معیشت کی ساکھ اور ترقی میں اہم کردار ادا کر رہے ہیں ۔ آرمی چیف نے سمندرپار پاکستانیوں کی ترسیلات،سرمایہ کاری اور دیگر شعبوں میں کامیابیوں کو خراجِ تحسین پیش کیا اور انہیں ملکی ترقی میں ریڑھ کی ہڈی قرار دیا ۔
آرمی چیف نے اوورسیز کمیونٹی کے ساتھ روابط اور اشتراکِ عمل کو مزید بڑھانے پر زور دیا تاکہ مشترکہ چیلنجز سے نمٹ کر ایک خوشحال پاکستان کی جانب بڑھا جا سکے۔
اوورسیز پاکستانیوں نے فیلڈ مارشل عاصم منیر کے ساتھ اپنے خیالات ، تجربات اور تجاویز کا تبادلہ بھی کیا ۔ ایک مضبوط ، محفوظ اور مستحکم پاکستان کیلئے مل کر کام کرنے کے عزم کا اعادہ کیا گیا۔
