وزیراعظم شہباز شریف کی ایرانی سفارتخانے آمد۔۔ اسرائیلی جارحیت میں شہید ہونے والے ایرانی افواج کے جوانوں، افسروں، اعلیٰ عسکری قیادت، انجینئرز، سائنسدانوں اور عام شہریوں کو خراج عقیدت پیش کیا اور ایرانی سفیر سے تعزیت بھی کی۔
وزیراعظم نے تعزیتی کتاب میں اپنے تاثرات بھی درج کئے۔۔
نائب وزیراعظم اور وزیر خارجہ اسحاق ڈار، وزیر اعظم کے مشیر طارق فاطمی اور سیکرٹری خارجہ بھی ان کے ہمراہ تھے۔
سفارت خانے آمد پر پاکستان میں ایرانی سفیر رضا امیری مقدم اور سفارتخانے کے سینئر ارکان نے نے وزیر اعظم کا استقبال کیا۔
وزیر اعظم نے اس مشکل وقت میں ایران کے ساتھ پاکستان کی ہمدردی اور یکجہتی کا اعادہ کرتے ہوئے ایران کے عوام اور حکومت کے ساتھ گہری تعزیت کا اظہار کیا۔
انہوں نے ایرانی قوم کی استقامت اور حوصلے کو زبردست خراج تحسین پیش کرتے ہوئے شہید ہونے والوں اور زخمیوں کی جلد صحت یابی کے لیے دعا کی۔
ایران کو پاکستان کی مسلسل حمایت کا یقین دلاتے ہوئے وزیراعظم نے ایرانی سپریم لیڈر آیت اللہ علی خامنہ ای اور صدر ڈاکٹر مسعود پیزشکیان کے لیے اپنی نیک خواہشات کا اظہار بھی کیا۔
